සෞදි අරාබියේ දී මරණ දඩුවම නියමවී සිටින ශ්රී ලාංකිකයකු වන සිවරාසා අනෝජන්ගේ දෙමාපියන් අද (21) විපක්ෂ නායක සජිත් ප්රේමදාස හමු වී තිබෙනවා.
ඒ කොළඹ පිහිටි විපක්ෂනායක කාර්යාලයේදීයී.
එසේ පැමිණ ඇත්තේ, සිවරාසා අනෝජන්ගේ පියා වන තම්බිරාජා සිවරාසා, මව වන රාසමානික්යම් යෝගලක්ෂ්මි සහ සහෝදරයා වූ සිවරාසා හම්සිදන් ඇතුළු පවුලේ ඥාතින්.
ඔවුන් සමඟ සිදු කළ සාකච්ඡාව අතරතුර සෞදියේ ශ්රී ලංකා තානාපතිවරයා ලෙස කටයුතු කරන අමීර් අජ්වාඩ් දුරකථනය ඔස්සේ සම්බන්ධ කරගත් විපක්ෂනායකවරයා, අනෝජන් ගේ නිදහස සම්බන්ධයෙන් රටක් ලෙස අපට ගතහැකි ඉදිරි පියවර පිළිබඳ සාකච්ජා කර තිබෙනවා.
ඊට අමතරව දැනට සෞදි බන්ධනාගාරයේ සිටින සිවරාසා අනෝජන් ද දුරකථනය ඔස්සේ කතා කර ගනිමින් ඔහුගේ තත්ත්වය සොයා බැලූ විපක්ෂනායකවරයා ඉන් අනතුරුව මෙරට විදේශ කටයුතු අමාත්යාංශයේ ලේකම් අරුණි රණරාජා සම්බන්ධ කරගනිමින්, අදාළ නීතිමය තත්ත්වය සහ සිවරාසා අනෝජන් නිදහස් කරගැනීම සඳහා රජය දැනට ගෙන ඇති ක්රියාමාර්ග පිළිබඳවද සොයා බලා තිබෙන බව වාර්තා වෙනවා.
එමෙන්ම, විදෙස්ගතව සිටිමින් තම රට වෙනුවෙන් ශ්රමය කැප කළ ශ්රී ලාංකිකයකු වන සිවරාසා අනෝජන්ගේ නිදහස උදෙසා කළ හැකි උපරිම දේ සිදු කිරීමටත්, අදාළ පාර්ශවයන්හි අවධානය ඒ වෙනුවෙන් අඛණ්ඩව යොමු කරවමින්, ඔහු නිදහස් කර ගැනීම සඳහා අඛණ්ඩව සහය ලබාදෙන බවටත් විපක්ෂ නායක සජිත් ප්රේමදාස එහිදී සහතිකයක් ලබා දී තිබෙනවා.
