විදෙස් රටවල ලොතරැයි දිනුම් ඇදී ඇති බවට හා විදෙස් රටකින් වටිනා ත්‍යාගයක් ලැබී ඇති බවට පවසමින් අන්තර්ජාලය ඔස්සේ මුදල් වංචා කළ විදෙස් ජාතිකයින් 14 දෙනෙකු පොලීසිය විසින් අත්අඩංගුවට ගෙන තිබේ.
පොලිස් මාධ්‍ය හා තොරතුරු කොට්ඨාසය භාර නියෝජ්‍ය පොලිස්පති ලාල් සෙනෙවිරත්න මහතා සඳහන් කළේ, නයිජීරියානු, චීන සහ පිලිපීන ජාතිකයින් පිරිසක් මෙලෙස අත්අඩංගුවට ගෙන ඇති බවය.
ඔවුන් විසින් රුපියල් කෝටි 06කට අධික මුදලක් වංචා කර ඇති බවට පැමිණිලි 101ක් අපරාධ පරික්ෂණ දෙපාර්තමේන්තුවට මේ වන විට ලැබී ඇති බව නියෝජ්‍ය පොලිස්පති ලාල් සෙනෙවිරත්න මහතා වැඩිදුරටත් සඳහන් කළේ ය.
මේ අතර සුරාබදු දෙපාර්තමේන්තු ව සහ වාඩබලන පොලිස්පතිවරයා අතර විශේෂ සාකච්ඡාවක් අද (17) දිනයේ පැවැත්විමට නියමිත ව තිබේ.
සුරාබදු දෙපාර්තමේන්තු වේ මාධ්‍ය ප්‍රකාශක සුරාබදු අධිකාරි කපිල කුමාරසිංහ මහතා සඳහන් කළේ, දෙපාර්තමේන්තු මට්ටමින් සිදුකරන වැටලීම් සම්බන්ධයෙන් සාකච්ඡා කිරීම මෙහි අරමුණ බවය.
