කොළඹ දිස්ත්‍රික්කයේ තෝරාගත් ඉන්ධන පිරවුම්හල් කිහිපයක හෙට (21) සිට නියමු ව්‍යාපෘතියක් ලෙස ජාතික ඉන්ධන අවසරපත්‍රයට අනුව ඉන්ධන ලබාදීම සිදු කිරීමට නියමිතය.
එම ක්‍රමවේදය ලබන 25 වනදා සිට දිවයින පුරා ක්‍රියාත්මක කිරීමට නියමිතය.
ඒ අනුව හෙට දිනයේ ජාතික ඉන්ධන අවසරපත්‍රයට අනුව ඉන්ධන ලබාදීම සිදු කිරීමට නියමිත කොළඹ පිහිටි ඉන්ධන පිරවුම්හල් පහතින්.
මේ අතර සිපෙට්කෝ පිරවුම්හල්වලින් වාහනවල ලියාපදිංචි අංකයේ අවසන් ඉලක්කම අනුව සීමා සහිතව ඉන්ධන නිකුත් කිරීම හෙට සිට දිවයිනපුරා ආරම්භ කෙරේ.
ඒ අනුව දින ගණනාවකට පසු සිපෙට්කෝ පිරවුම්හල් හරහා ඉන්ධන බෙදාහැරිම හෙට සිට යළි ආරම්භ කිරිමට තීරණය කර තිබේ.
ලියාපදිංචි අංකයේ අවසන් ඉලක්කම 0,1,2 වන වාහන සඳහා අඟහරුවාදා සහ සෙනසුරාදා ද , අවසන් ඉලක්කම 3,4,5 වන වාහන සඳහා බ්‍රහස්පතින්දා සහ ඉරිදා යන දිනවලදී ඉන්ධන ලබාගත හැකිය.
එමෙන්ම ලියාපදිංචි අංකයේ අවසන් ඉලක්කම 6,7,8 සහ 9 වන වාහන සඳහා සඳුදා, බදාදා සහ සිකුරාදා යන දිනවලදී ඉන්ධන ලබාගත හැකිය.
බලශක්ති අමාත්‍යාංශය සඳහන් කළේ යතුරුපැදි සඳහා රුපියල් 1500ක්, ත්‍රිරෝද රථ සඳහා රුපියල් 2000ක් සහ අනෙකුත් වාහන සඳහා රුපියල් 7000ක උපරිමයකට යටත්ව ඉන්ධන ලබාදීම සිදුකෙරෙන බවය.
මෙම ක්‍රියාවලියට අනුගත නොවන පිරිස් වෙත ඉන්ධන ලබා නොදීමටත් ඊට අනුගත නොවන ඉන්ධන පිරවුම්හල් වෙත ඉන්ධන නිකුත් නොකිරීමටත් තීරණය කර ඇති බව ද එම අමාත්‍යාංශය වැඩිදුරටත් සඳහන් කළේය.
