සිවුරු පොරවාගත් දෙදෙනෙක් ඇතුළු සිව්දෙනෙක් නිවසකට ඇතුළුවී එහි සිටි අඹු-සැමි යුවළක් කඩුවලින් කපා තුවාල සිදුකිරීමේ සිද්ධියක් පිළිබඳව පැමිණිලක් පසුගිය 15 වනදා පොලීසිය ලැබී තිබුණි.
ඒ පොලිස් හදිසි ඇමතුම් අංකයට කොටදෙණියාව වත්තේමුල්ල ප්‍රදේශයේ නිවසකින් ලැබී තිබූ ඇමතුමකට අනුව එහි ගිය අවස්ථාවේදීය.
ඒ මොහොතේ ජංගම මුර සංචාරයේ නිරතවී සිටි පොලිස් කණ්ඩායමක් අදාළ නිවසට ගිය අවස්ථාවේදී සැකකරුවන් ප්‍රදේශය මගහැර පළාගොස් තිබුණි.
එම නිවසේ කාන්තාවගෙන් ප්‍රශ්න කිරීමේදී ඇය සඳහන් කර ඇත්තේ, සිවුරු පොරවාගත් දෙදෙනෙක් ඇතුළු සිවුදෙනෙක් බීමත්ව කඩු හා මන්නා පිහි රැගෙන නිවසට ඇතුළුවී නිවසේ එම අවස්ථාවේ සිටි අසල්වැසි නිවසක පදිංචි අඹු සැමි යුවළක් කඩුවලින් කපා තුවාල සිදුකළ බවය.
තමාගේ දුවටද සැකකරුවන් පහරදීමට තැත් කළ බව ඇය පොලීසියට ප්‍රකාශයක් ලබාදී තිබුණි.
ඒ අනුව පොලීසිය සඳහන් කරන්නේ එම සිදුවීමත් සමග ප්‍රදේශයේ ජනතාව නොසන්සුන් වී පිරිසක් සැකකරුවන්ගේ නිවසට ගල්මුල් ප්‍රහාරයක් ද එල්ල කර ඇති බවය.
ඒ අනුව අදාළ සැකකරුවන් වත්තේමුල්ල ප්‍රදේශයේ කැලෑවක සැඟව සිටියදී පසුගිය 16වනදා අලුයම් කාලයේදී ප්‍රදේශවාසීන් විසින් අල්ලාගෙන පොලීසියට භාරදී තිබුණි.
පොලීසිය සඳහන් කරන්නේ එම සැකකරුවන් දෙදෙනා චීවරධාරීන් වන අතර ඔවුන් වත්තේමුල්ල, බාදුරුගොඩ ලිපිනයේ පිහිටි නිවසට වරින්වර පැමිණ බීමත්ව ප්‍රදේශවාසීන්ට බැණ වදිමින් හිරිහැර කරන බවට අනාවරණය වූ බවය.
අත්අඩංගුවට ගත් සැකකරුවන් දෙදෙනා එළඹෙන 28 වනදා දක්වා රක්ෂිත බන්ධනාගාර ගත කර තිබේ.
සිද්ධිය සම්බන්ධයෙන් විමර්ශනය කළ පොලීසියට අනාවරණය වී ඇත්තේ සැකකරුවන් ට විරුද්ධව සොරකම් කිරීම්, නිවාස බිඳීම් සම්බන්ධයෙන් නඩු පවතින බවය.
එසේම මෙම සිද්ධිය සම්බන්ධව අවශ්‍යව සිටි තවත් සැකකරුවෙක් අද (22) අලුයම පස්යාල ප්‍රදේශයේදී කොටදෙනියාව පොලීසිය විසින් අත්අඩංගුවට ගෙන ඇති අතර ඔහු 24 හැවිරිදි පුද්ගලයෙකි.
සැකකරුවන් තිදෙනා සම්බන්ධයෙන් වැඩිදුර විමර්ශනවලදී අනාවරණය වී ඇත්තේ දැනට මාස කිහිපයකට පෙර කොටදෙණියාව ප්‍රදේශයේ අතුරුදන් වූ ළමුන් දෙදෙනාගේ වැඩිමහල් සොහොයුරන් බවය.
ඔවුන් පදිංචි නිවස අල්කයිඩා නිවස යනුවෙන් හැඳින්වීමට ගම්වාසීන් පුරුදුවී ඇති බවත් පොලීසිය සඳහන් කරයි.
එසේම මෙම සැකකරුවන් සංවිධානාත්මක අපරාධ කල්ලියක සාමාජිකයින් ලෙස හැඳින්වීමට මෙතෙක් සිදුකරන ලද විමර්ශන අනුව අනාවරණය වී නොමැති බවත් පොලීසිය සඳහන් කරයි.
එම සැකකරුවන් වරින් වර පන්සල්වලට ගොස් චීවරය පොරවාගෙන බෞද්ධ ස්වාමීන්වහන්සේලා ලෙස පෙනීසිටිමින් විටින්විට ගම් ප්‍රදේශයට පැමිණ කලහකාරී ලෙස හැසිරී ගම්වාසීන්ට හිරිහැර කිරීම් සිදුකරන ඇති බවත් පොලීසිය සඳහන් කරයි.
මේ හේතුවෙන් මාධ්‍ය දැනුවත් කර මෙම පවුල සිය ගම්මානයෙන් ඉවත්කර දෙන ලෙස ගම්වාසීන් පොලීසියෙන් ඉල්ලා සිටින බවත් පොලීසිය සඳහන් කළේය.
අල්කයිඩා යන නාමයෙන් මෙම පවුල හඳුන්වනු ලබන්නේ ඔවුන්ගේ ක්‍රියාකලාපය හේතුවෙන් පමණක් බවත් පොලීසිය වැඩිදුරටත් සඳහන් කරයි.
