ජනාධිපතිවරයාගෙන් මෙතෙක් තමාට කිසිදු කැඳවීමක් සිදුනොවුණ බව මහජන උපයෝගීතා කොමිසමේ සභාපති ජනක රත්නයායක මහතා පවසයි.
“අද දෙරණ BIG FOCUS” වැඩසටහන සමග එක්වෙමින් ඒ මහතා මේ බව කියා සිටියේය.
“අපි බලාගෙන ඉන්නවා එතුමාට ගිහින් මේ ගැන පැහැදිලි කරලා දෙන්න.” යනුවෙන් ද ජනක රත්නායක මහතා එහිදී පැවසීය.
පසුගිය දා පාර්ලිමේන්තුවේ දී විදුලිබිල වැඩිකිරීම සම්බන්ධයෙන් විශේෂ කතාවක් සිදුකරමින්
ජනාධිපතිවරයා, මහජන උපයෝගීතා කොමිසමේ සභාපතිවරයාගේ හැසිරීම සම්බන්ධයෙන් සැර ප්රකාශයක් සිදුකළේය.
මේ අතර, විදුලිබිල වැඩිකිරීම සම්බන්ධයෙන් මෙතෙක් විදුලිබල මණ්ඩලය විසින් මහජන උපයෝගීතා කොමිසමට කිසිදු දැනුම්දීමක් සිදුකර නොමැති බව ජනක රත්නායක මහතා පැවසීය.
“විදුලි කප්පාදුවක් සිදුකරනවා ද? විදුලි බිල වැඩිකරනවා ද කියන පදනම මත විදුලිබිල සංශෝධනය කිරීමේ කිසිම හැකියාවක් නෑ. ඒක පුහු තර්කයක්. මේ අවස්ථාව වෙද්දි විදුලිය පැය 2යි විනාඩි 20ක් කපනවා. දැන් කරන්න ඕනේ සම්පූර්ණයෙන් ම විදුලිබලය දෙන්න ඕනේ. එතකොට කියන්න ඕනේ අපි දැන් විදුලිය දීලා තියෙන්නේ මෙන්න අපේ වියදම අයකර ගන්න ඕනේ කියලා. ඒක සාධාරණයි. මට හිතෙන්නේ මේක විහිළුවට කාරණාවක්. විදුලිබිල වැඩිකිරීමේ ක්රමවේදයක් පනතේ නෑ. මේ විද්යානුකූලව කරන්නේ. “
අද දෙසැම්බර් 29 වෙනිදා. අද වෙනකල් කිසිම විදුලි බිල සංශෝධනය පිළිබඳ යෝජනාවක් විදුලිබල මණ්ඩලයෙන් තාම කෙරිලා නෑ. ඒ අනුව මහජන උපයෝගීතා කොමිසම ට මේ පිළිබඳ කිසිම තීරණයක් ගන්න බෑ. ඒ ක්රමවේදය ඒ යෝජනාව එන්න ඕනේ අපිට. ඒක කැබිනට් එකට දාන එක කිසිම ඵලයක් නෑ. මොකද ඒක නෙමෙයි ක්රමවේදය. මේක කැබිනට් එකට දානවා දානවා කියලා මහජනතාව බයකරන්න කරන්න හදනවා ද දන්නෙත් නෑ. ඒ ක්රමවේදය තියෙන්නේ යෝජනාවක් තියෙනවා නම්, එය මහජන උපයෝගීතා කොමිසමට ඉදිරිපත් කළ යුතුයි. අපි තාමත් බලාගෙන ඉන්නවා තීරණයක් ගන්න.”
