බලශක්ති අමාත්‍ය නීතිඥ උදය ගම්මන්පිල මහතා සහ ප්‍රවාහන අමාත්‍ය නීතිඥ පවිත්‍රා වන්නිආරච්චි මහත්මිය අතර හමුවක් 2021.09.28 දින බලශක්ති අමාත්‍යාංශයේ දී පැවැත්විනි. බලශක්ති අමාත්‍යාංශය සහ ප්‍රවාහන අමාත්‍යාංශය එක්ව දුම්රිය මගින් ඉන්ධන ප්‍රවාහනය 60% දක්වා වර්ධනය කිරීම සම්බන්ධයෙන් මෙහිදී සාකච්ඡා විය.
බවුසර් මගින් ඉන්ධන බෙදාහැරීමේදී සිදුවන පිරිවැය අධික වීම, පරිසර දූෂණය සහ වාහන තදබදය පිළිබඳ බලශක්ති අමාත්‍ය නීතිඥ උදය ගම්මන්පිල මහතාගේ අවධානයට යොමු විය. ඒ අනුව එම තත්වයන් අවම කර ගැනීම සදහා 30% තිබුණු දුම්රිය මගින් ඉන්ධන ප්‍රවාහනය 60% දක්වා වර්ධනය කිරීමට ප්‍රතිපත්තිමය තීරණයක් ගනු ලැබීය.
ඒ අනුව ඉන්ධන බෙදාහැරීම සඳහා දුම්රිය භාවිතා කිරීම මේ වන විට 38% දක්වා ඉහළ නැංවීමට කටයුතු කර ඇත. ඉදිරි ඉලක්ක සපුරා ගැනීම සදහා දුම්රිය දෙපාර්තමේන්තුව සතු ටැංකි සහිත ගැල් අළුත්වැඩියා කිරීම, නව ටැංකි සහිත ගැල් මිලදී ගැනීම, දිගු දුම්රිය දෙකකට මාරු විය හැකි අයුරින් දුම්රිය ස්ථාන සැකසීම ඇතුළු යටිතල පහසුම් වැඩිදියුණු කිරීමට එහිදී තීරණය විය.
බලශක්ති අමාත්‍යාංශ ලේකම් කේ ආර් ඩී ඔල්ගා, ප්‍රවාහණ අමාත්‍යාංශ ලේකම් මොන්ටි රණසිංහ, ලංකා ඛනිජ තෙල් සංස්ථාවේ සභාපති සුමිත් විජේසිංහ, දුම්රිය සාමාන්‍යාධිකාරි ධම්මික ජයසුන්දර යන මහත්ම මහත්මීන් ඇතුළු පිරිසක් මේ සාකච්ඡාව සදහා එක් විය.
