අනුරාධපුර ඇලයාපත්තුව ප්‍රදේශයේ නිවසක හටගත් ගින්නට හේතුව මෙතෙක් අනාවරණ වී නොමැති බව පොලීසිය පවසයි.
අනුරාධපුර – මහමාන්කඩවල ඇලයාපත්තුව ප්‍රදේශයේ නිවසක ඊයේ (26) රාත්‍රි 11.30 ට පමණ ඇතිවූ ගින්නකින් පිළිස්සී මවක් සහ ඇයගේ දරුදෙදෙනා ජීවිතක්ෂයට පත්විය.
ගින්නෙන් තුවාල ලැබූ පියා අනුරාධපුර ශික්ෂණ රෝහලට ඇතුළත් කර මේ වනවිට ප්‍රතිකාර ලබමින් පසුවෙයි.
මෙම ගින්න හටගෙන ඇත්තේ මව, සහ දරුවන් දෙදෙනා නිදා සිටි කාමරය තුළය.
ගින්න ඇතිවන අවස්ථාවේ පියා නිදා සිට ඇත්තේ වෙනත් කාමරයක බැවින් වහා කලබල වූ ඔහු සිය බිරිඳ සහ දරුවන් බේරාගැනීම සඳහා කාමරයට එන විටත් ගින්න සම්පූර්ණයෙන්ම කාමරේ පැතිරී ගොස් අවසන් බව වාර්තා වේ.
ගින්නෙන් 33 හැවිරිදි මවට, 10 හැවිරිදි දියණියට සහ 05 හැවිරිදි පුංචි පුතුට දිවි අහිමි විය.
ඔවුන්ගේ සිරුරු හඳුනාගැනීමට පවා නොහැකි තරමට පිළිස්සී තිබූ බව පැවසෙයි.
බිරිඳ සහ දරුවන් බේරාගැනීමට උත්සාහ කිරීමේදී බරපතළ පිළිස්සුම් තුවාල ලැබූ පියා මේ වනවිටත් අනුරාධපුර ශික්ෂණ රෝහලේ ප්‍රතිකාර ලබමින් සිටින්නේ සිය දරු පවුලේ වියෝව පිළිබඳ කඳුළු සලමිනි.
අනුරාධපුර වැඩබලන මහෙස්ත්‍රාත් චන්දන වීරකෝන් මහතා අද (27) දහවල් පැමිණ සිද්ධිය සම්බන්ධයෙන් මහෙස්ත්‍රාත් පරීක්ෂණය සිදුකර තිබේ.
ගින්නට හේතුව මෙතෙක් අනාවරණ වී නොමැති නමුත් පියා පොලීසියට පවසා ඇත්තේ ගින්න ඇතිවන අවස්ථාවේ කාමරයේ පෙට්‍රල් බෝතලයක් තිබුණු බවය.
එමෙන්ම මෙම නිවසට විදුලිය සපයාගෙන ඇත්තේ අසල නිවසකින් බව පොලිස් පරීක්ෂණවලදී අනාවරණය වී තිබේ.
කෙසේවෙතත්, ගින්නට හේතුව අනාවරණ කළ හැක්කේ රස පරීක්ෂක වාර්තාව ලැබුණු පසුව බව ඇලයාපත්තුව පොලීසිය පැවසීය.
සිද්ධිය දුටු ඥාතියෙක් සඳහන් කළේ,
“මම ඇවිත් කෑගැහුවා. ශාන්ත පුතේ කෝ ළමයි දෙන්නා කියලා ඇහුවා. එතකොට..ලොකු අම්මේ ළමයි දෙන්නා ඇතුළේ පිච්චෙනවා කිව්වා. ඒ වෙලාවේ ළං වෙන්නවත් බැහැ. හෝස් හෝස් ගාලා ගිනි ගන්නවා.”
