මහර බන්ධනාගාර ගැටුම – තුවාල ලැබූ ගණන 109ක් දක්වා ඉහළට
මහර බන්ධනාගාරය තුළ සිදුවූ ගැටුම්කාරී තත්ත්වයේදී තුවාල ලබා ප්රතිකාර සඳහා රාගම රෝහලට ඇතුළත් කළ පිරිස 109ක් දක්වා ඉහළ ගොස් තිබේ.
රැඳවියන් 107ක් හා බන්ධනාගාර නිලධාරීන් දෙදෙනෙක් ඒ අතර වන බවත් අවසන් වශයෙන් රෝහල්ගත කළ රැඳවියන්ට සාමාන්ය තුවාල පමණක් ඇති බව වාර්තා වු බවත් පොලිස් මාධ්ය ප්රකාශක, නියෝජ්ය පොලිස්පති අජිත් රෝහණ මහතා පවසයි.
අද (01) උදෑසන “දෙරණ අරුණ“ සමග එක්වෙමින් වැඩිදුරටත් මෙසේ අදහස් දැක්වීය.
“ඊයේ වෙන කොට 8 දෙනෙක් මියගිහින් 60 දෙනෙක් තුවාල වෙලා තිබුණා. සිරකරුවන් හා රැඳවියන් අතර ගැටුම් ඇති වෙලා තියෙනවා ඔවුන් ඔවුන්ම. අද උදෑසන 3 වන විට යම් යම් තුවාලකරුවන් රෝහල්ගත කරා. මේ වන විට රැඳවියන් 107 දෙනෙක් රෝහල්ගත කරලා තියෙනවා. බන්ධනාගාර නිලධාරීන් දෙදෙනා සමග 109ක් රෝහල්ගත කරලා තියෙනවා. ඊට අමතරව මරණ 8ක් වාර්තා වෙලා තියෙනවා. අවසන් වශයෙන් ඇතුළත් කළ අය සාමාන්ය තුවාල ලබා ඇති බවට තොරතුරු වාර්තා වෙනවා. ඒ පිළිබඳ තවමත් ප්රකාශ සටහන් කර ගෙන නෑ. ඔවුන් රාගම රෝහලේ කොවිඩ් ආසාදිතයින්ගේ වාට්ටුවට ඇතුළත් කරලා තියෙනවා ආරක්ෂිතව.“
මහර බන්ධනාගාරයේ රැඳවියන් පිරිසකට කොරෝනා වෛරසය ආසාදනය වීමත් සමඟ තවත් රැඳවියන් පිරිසක් බන්ධනාගාරයෙන් පළායාමට උත්සාහ දැරීමේ සිද්ධියක් හේතුවෙන් මුල්කර ගනිමින් පෙරේදා (29) දහවල් මෙම නොසන්සුන්කාරී තත්ත්වය හටගෙන තිබුණි.
ඒ අනුව එදින පස්වරුව වන විට මෙය ගැටුමක් දක්වා දුරදිග ගොස් ඇති අතර දැනට බන්ධනාගාරය තුළ රඳවා සිටින ජීවීතාන්තය දක්වා සිරදඬුවම් හිමිවූ සිරකරුවන්ට රිමාන්ඩ් බන්ධනාගාර ගතකර සිටින සිරකරුවන් පහරදීමට පටන්ගෙන ඇති බව වාර්තා වේ.
අනතුරුව තත්ත්වය පාලනය කිරීම සඳහා බන්ධනාගාර නිලධාරීන් අවම බලය පාවිච්චි කර ඇති අතර එහිදී වෙඩි ප්රහාර කිහිපයක් ද එල්ල කර තිබේ.
