රාගම හීන්කන්ද ප්‍රදේශයේ නිවසක් පිටුපස වෙල්යායක පවත්වාගෙන ගිය නීතිවිරෝධී මත්පැන් නිෂ්පාදනාගාරයක් කැලණිය කොට්ඨාස දූෂණ මර්දන අංශයේ නිලධාරීන් විසින් පසුගියදා වටලා තිබුණි.
එම නිවසේ හිමිකරු වත්තල ප්‍රාදේශීය සභාවේ ශ්‍රී ලංකා පොදුජන පෙරමුණු මන්ත්‍රීවරයෙකු වන නීල් ඉන්දික මහතාය.
ඔහුගෙන් මේ පිළිබඳ නිලධාරීන් විමසූ අවස්ථාවේ දී ඔහු පවසා තිබුණේ තමන් ඒ පිළිබඳව කිසිවක් නොදන්නා බවය.
මේ අතර වත්තල ප්‍රාදේශීය සභාවේ ශ්‍රී ලංකා පොදුජන පෙරමුණේ මන්ත්‍රී රොෂාන් තිරිමාන්න මහතා ඊයේ (14) මාධ්‍ය හමුවක් පවත්වමින් චෝදනා එල්ලවී සිටින මන්ත්‍රිවරයාගේ ක්‍රියාකලාපය විවේචනය කළේය.
එම මාධ්‍ය හමුවෙන් පසු රොෂාන් තිරිමාන්න මන්ත්‍රීවරයාට ඊයේ රාත්‍රියේ සිය නිවසේ දී ප්‍රහාරයක් එල්ල වී තිබුණි.
ඔහු පවසන්නේ නීල් ඉන්දික මන්ත්‍රීවරයා, ඔහුගේ පුත්‍රයා සහ තවත් ඥාති පුත්‍රයෙකු සමග පැමිණ එලෙස පහරදුන් බවය.
පහර කෑ මන්ත්‍රීවරයා මේ වනවිට රාගම ශික්ෂණ රෝහලේ ප්‍රතිකාර ලබමින් පසුවේ.
පහරදුන් බවට චෝදනා එල්ලවන නීල් ඉන්දික මන්ත්‍රීවරයා ඇතුළු සැකකරුවන් තිදෙනා වත්තල පොලීසිය විසින් අද (15) අත්අඩංගුවට ගැනුණු අතර වත්තල මහෙස්ත්‍රාත් අධිකරණයට ඉදිරිපත් කිරීමෙන් පසු ඔවුන් ලබන 22 වනදා දක්වා රක්ෂිත බන්ධනාගාරගත කෙරුණි.
