මොරවක, ඇටකාල ප්‍රදේශයේදී ඇති වූ නොසන්සුන්කාරී වාතාවරණය සම්බන්ධයෙන් පූර්ණ විමර්ශනයක් ආරම්භ කර ඇති බව පොලීසිය පවසයි.
ඊයේ (04) රාත්‍රී කිසියම් පිරිසක් ප්‍රදේශයේ පුද්ගලයෙකුට පහරදීමට සූදානමින් සිටින බවට 119 පොලිස් හදිසි ඇමතුම් අංශයට තොරතුරක් ලැබී තිබේ.
ඒ අනුව මොරවක පොලීසියේ නිලධාරීන් දෙදෙනෙකු අදාළ ස්ථානයට ගොස් පරීක්ෂා කර ප්‍රශ්න කිරීම් සිදුකරන අවස්ථාවේදී එහි සිටි පුද්ගලයෙකු හදිසියේ ඇති වූ අසනීප තත්ත්වයක් හේතුවෙන් මොරවක රෝහලට ඇතුළත් කිරීමේදී මියගොස් ඇත.
මෙලෙස මියගොස් ඇත්තේ මෙම සිද්ධියට අදාළ පුද්ගලයාගේ පියා වන අතර ඔහු 55 හැවිරිදි මොරවක, ඇටකාල ප්‍රදේශයේම පදිංචිකරුවෙකු බව සඳහන් වේ.
කෙසේවෙතත් මෙම අවස්ථාවේදී ප්‍රදේශවාසීන් නොසන්සුන්කාරී ලෙස හැසිරී ඇති බව පොලීසිය සඳහන් කළේය.
ප්‍රදේශවාසීන් පවසන්නේ අදාළ අවස්ථාවේ පොලිස් නිලධාරීන් දෙදෙනා බීමතින් සිටි බවය.
එමෙන්ම පොලීසියේ ක්‍රියා කලාපය හේතුවෙන් අදාළ පුද්ගලයා මියගිය බවට ද ප්‍රදේශවාසීන් චෝදනා කරයි.
මේ අතර තත්ත්වය පාලනය කිරීම සඳහා අවට පොලිස් ස්ථාන කිහිපයකින්ම පොලිස් නිලධාරීන් මොරවක, ඇටකාල ප්‍රදේශයට කැඳවා ඇත.
අනතුරුව එහි පැමිණි මාතර කොට්ඨාශ දෙක භාර සහකාර පොලිස් අධිකාරීවරයා ප්‍රදේශවාසීන්ට කරුණු පැහැදිලි කර ඔවුන් නිවාස වෙත පිටත් කර හැරීමට පියවර ගෙන තිබේ.
කෙසේවෙතත් මියගිය පුද්ගලයාගේ පශ්චාත් මරණ පරීක්ෂණ කටයුතු අද සිදුකර ඇති අතර එහිදී අනාවරණය වී ඇත්තේ හෘදයේ සෛල අකර්මන්‍ය වීමෙන් ඇති වූ සංකූලතා මත මෙම මරණය සිදුව ඇති බවය.
මේ අතර අදාළ ප්‍රදේශයට ගිය පොලිස් නිලධාරීන් දෙදෙනා අද දිනයේ වෛද්‍ය පරීක්ෂණයකට යොමු කර ඇති අතර එහිදී ඔවුන් මත්පැන් පානය කර නොසිටි බව අනාවරණය වී ඇත.
