හංවැල්ල ආපන ශාලාවක හිමිකරුවෙකු ඝාතනය කිරීමට යොදාගත් යතුරුපැදිය පොලීසිය විසින් සොයාගෙන තිබේ.
අදාළ යතුරුපැදිය හංවැල්ල පහත්ගම ප්‍රදේශයේ අතුරුමාර්ගයක දමා ගොස් තිබියදී මෙලෙස පොලීසිය විසින් සොයාගෙන ඇත.
ඝාතකයන් විසින් යතුරුපැදිය නතරකර ඇති ස්ථානය අවට මිරිස් කුඩු ඉස පලාගගොස් ඇති බවට තොරතුරු වාර්තාවෙයි.
මේ අතර පොලීසිය සිදුකළ මූලික විමර්ශනවලදී අනාවරණය වී ඇත්තේ එම යතුරුපැදියේ චැසි අංක සහ එන්ජින් අංක මකා දමා ඇති බවය.
පොලීසිය විසින් යතුරුපැදිය සොයාගන්නා අවස්ථාවේ එහි අංක තහඩුද තිබී නොමැත.
ඝාතනයට ලක්වූ වෙළෙඳසැලේ හිමිකරුගේ සොහොයුරාට මීට පෙර කිසියම් පිරිසක් විසින් කපාකොටා තුවාල සිදුකර තිබේ.
එම අපරාධයට සම්බන්ධ වූ පුද්ගලයින් අත්අඩංගුවට ගැනීම සඳහා ඝාතනයට ලක්ව ඇති පුද්ගලයා විසින් පොලීසියට සහාය ලබාදීම හේතුවෙන් ඔහුට මෙම වෙඩි ප්‍රහාරයට එල්ලවන්නට ඇති බවට සැකපළකරයි.
මේ අතර මෙලෙස ඝාතනයට ලක්ව ඇති පුද්ගලයා හංවැල්ල පොලිස් ස්ථානයේ සිවිල් ආරක්ෂක කමිටු සාමාජිකයෙක් බවටද තොරතුරු වාර්තාවෙයි.
මෙම ඝාතනයට සම්බන්ධ සැකකරුවන් අත්අඩංගුවට ගැනීම සඳහා හංවැල්ල පොලීසියට අමතරව නුගේගොඩ කොට්ඨාස අපරාධ විමර්ශන අංශය සහ බස්නාහිර පළාත දකුණ අපරාධ කොට්ඨාසයේ ඒකාබද්ධව පරීක්ෂණ පවත්වයි.
