පාකිස්තානයේ දී ශ්‍රී ලාංකිකයෙකු ඝාතනයට සම්බන්ධ සියලුදෙනාට දඬුවම් ලබා දෙනු ඇති බවට ශ්‍රී ලංකා රජය සහ ජනතාව තබා ඇති විශ්වාසය උපරිමයෙන් තහවුරු කරන බව පාකිස්තාන අග්‍රාමාත්‍ය ඉම්රාන් ඛාන් මහතා පවසයි.
ජනාධිපති ගෝඨාභය රාජපක්ෂ මහතා සමග පැවති දුරකථන සංවාදයකදී පාකිස්තාන අග්‍රාමාත්‍යවරයා මේ පිළිබඳව දැනුම්දුන් බව ජනාධිපති මාධ්‍ය අංශය සඳහන් කළේය.
ඝාතනයට සම්බන්ධ සැකකරුවන් 113 දෙනෙකු මේ වන විටත් අත්අඩංගුවට ගෙන ඇති අතර සෙසු පිරිස් සොයා මෙහෙයුම් ක්‍රියාත්මක බව පාකිස්තාන අග්‍රාමාත්‍ය ඉම්රාන් ඛාන් මහතා ප්‍රකාශ කර තිබේ.
අපරාධකරුවන්ට දෙවියන් වහන්සේගෙන් සමාවක් නොමැති බවත් නීතියෙන්ද කිසිදු සමාවක් හිමි නොවන බවත් ඉම්රාන් ඛාන් මහතා ජනාධිපති ගෝඨාභය රාජපක්ෂ මහතා වෙත සඳහන් කළ බව ජනාධිපති මාධ්‍ය අංශය පැවසුවේය.
