ප්‍රමාණවත් පහසුකම් පැවතියත් අද වන විට විනාශ වෙමින් පවතින පාසල් භූමියක් පිළිබඳව ඇළහැර ප්‍රෙද්ශයෙන් “අද දෙරණට” වාර්තා විය.
මව්පියන් අදාළ බළධාරින්ගෙන් ඉල්ලා සිටින්නේ මෙම පාසල් භූමිය ඵලදායි ක්‍රියාවක් සඳහා භාවිත කරන ලෙසය.
ඉරහද කෙටූවැව මහා විද්‍යාලය, ඇළහැර ගොවිජනපද ව්‍යාපෘතිය ආරම්භ කිරීමත් සමඟ ඉදි වූ දීර්ඝ ඉතිහාසයකට උරුමකම් කියන පාසලකි.
ඇළහැර අධ්‍යාපන කොට්ඨාසයට අයත් මෙම පාසල මීට වසර 5 කට පෙර දියබෙදුම නගරය ආශ්‍රිත ස්ථානයකට රැගෙන ගොස් තිබේ.
එවකට එම විද්‍යාලයේ විදුහල්පති සහ ඇළහැර කොට්ඨාසයේ අධ්‍යාපන අධ්‍යක්ෂවරයාගේ අත්තනෝමතික ක්‍රියා හේතුවෙන් පාසල එලෙස වෙනත් ස්ථානයකට ගෙන ගොස් තිබුණි.
ඒ මව්පිය විරෝධය මධ්‍යයේය.
එහෙත් එහ පාසල් භූමියකට අවශ්‍ය පහසුකම් නොමැතිවීම හේතුවෙන් අද වන විට එහි සිප් සතර හදාරන දරුවන් දුෂ්කරතා රැසකට මුහුණ පා සිටින බව වාර්තා වේ.
පළමු ශ්‍රේණියේ සිට 13 වන ශ්‍රේණිය දක්වා සිප් සතර හදාරන දරුවන්ට ප්‍රමාණවත් තරම් ගොඩනැඟිලි පහසුකම් නව පාසල් භූමියේ නොමැතිවීම ඒ අතර පවතින ප්‍රධාන ගැටලුවකි.
පහසුකම් සහිත ගොඩනැඟිලි 11 ක් සහ ගුරු නිවාස 4 කින් සමන්විත පැරණි පාසල් භුමිය දිරාපත්වෙමින් ඇති අතර එය අද වන විට සමාජ විරෝධි ක්‍රියාවන්ට තෝතැන්නක් වී ඇති බව මව්පියන් පවසයි.
