දක්ෂතාවයට මුල්තැන දෙන රජයක් නිර්මාණය කිරීම සිය ඒකායන අරමුණ බව විපක්ෂ නායක සජිත් ප්රේමදාස මහතා පවසයි.
බදුල්ල ප්රදේශයේ පැවති වැඩසටහනකට එක්වෙමින් විපක්ෂ නායකවරයා මේ බව සඳහන් කළේය.
බදුල්ල, හාලිඇළ ශ්රී කාශ්යපාරාමයට ඊයේ (19) පැමිණි විපක්ෂ නායක සජිත් ප්රේමදාස මහතා එහි විහාරාධිපති පූජ්ය වලේවෙල සද්ධා රතනාලංකාර හිමියන් බැහැදැක ආශිර්වාද ලබා ගත්තේය.
එහිදී වැඩිදුරටත් අදහස් දැක්වු විපක්ෂ නායකවරයා,
“පළමුවෙන්ම කරන්නට ඕනේ අපි අපිටම ඇඟිලි දික්කර ගැනීම. ඒ කර්තව්යයේ මම නියැලී සිටිනවා. ඒ කර්තව්යයේ සමගි ජන බලවේගය නියැලී සිටිනවා. කැඩපතක් ඉදිරියට ගිහින් සිදුවුණු අඩුපාඩු, අසාධාරණකම්, ඌනතාවයන්, වැරදි මේ හැමදෙයක්ම අවබෝධ කරගෙන අපේ වැරදි නිවැරදි කරගෙන, අපේ වැරදි පිළිබඳව ජනතාවගෙන් සමාව ඉල්ලගෙන අපි නැවතවරක් අලුත් ගමනක් ඔස්සේ, පොදු ජනතාවගේ දෙපතුළ ළඟට මේ රටේ අති විශිෂ්ට සංවර්ධන යුගය බිහිකිරීමට අපි සුදානම්. මේ රටේ ප්රතිලාභ, සම්පත් බෙදා ගැනීමේ අවසරය ලබා දීමට අපි සුදානම්. පවුල් වාදයේ ගජමිතුරු සංකල්පය සම්පූර්ණයෙන්ම පසෙක දමා කුසලතාවය දක්ෂතාවයට හැකියාවට වැඩකරන්න පුළුවන් කණ්ඩායමට මේ රටේ රාජ්ය පාලනය ලබා දීලා නිවැරදි සංකල්පයක් ඕස්සේ අපි අපේ ගමන ක්රියාත්මක කිරීමට සුදානම්.“
