35000 ආසන්න පිරිසක් ස්වයං නිරෝධායනයට
අද වන විට පුද්ගලයින් 35,000කට අධික පිරිසක් ස්වයං නිරෝධායන ක්‍රියාවලිය ලක්වෙමින් සිටින බව පොලිස් මාධ්‍ය ප්‍රකාශක, නියෝජ්‍ය පොලිස්පති නීතිඥ අජිත් රෝහණ මහතා පවසයි.
අද (27) උදෑසන “දෙරණ අරුණ“ සමග එක්වෙමින් ඒ මහතා වැඩිදුරටත් පවසා සිටියේ, එම කටයුතු නිරන්තරයෙන් අධීක්ෂණයට ලක්වෙමින් ඇති බවය.
වැඩිදුරටත් අදහස් දැක්වු නියෝජ්‍ය පොලිස්පති නීතිඥ අජිත් රෝහණ මහතා,
“පසුගිය මාර්තු මාසයේ 18 වන දින සිට මේ දක්වා කාලය තුළ මට මතක විදියට 185,000ක් පමණ විවිධ අවස්ථාවල දී නිරෝධායන ක්‍රියාවලියට යොමු කළා. ඒ කියන්නේ ගෙවල්වල ඉන්න කියලා. ඒ අයව සියලු ආකාරයෙන් අධීක්ෂණ කටයුතු කළා. මේක කෙරෙන්නේ, සෞඛ්‍ය බලධාරීන් විසින් දැන්වීමක් අදාළ ස්ථානයේ අලවනවා. ඒ ඇලෙව්වට පස්සේ, අනිවාර්යයෙන්ම මේ ප්‍රදේශය භාරව ඉන්නවා විශේෂයෙන්ම ප්‍රජා පොලිස් නිලධාරීන්. ප්‍රජා පොලිස් සංකල්පයට අනුගතව කටයුතු කරනවා. හැම ග්‍රාමසේවා වසමකටම පොලිස් බල ප්‍රදේශ හරහා පත්කරලා තියෙනවා. ඔවුන්ගේ සේවය තමයි අපි යොදවන්න බලාපොරොත්තු වෙන්නේ මේ කටයුත්තට. එක පැත්තකින් ඒ නීතිය ක්‍රියාත්මක වෙන්න ඕනේ, දැන්වීමක් ගැහුවට පස්සේ ඒ අය නිවසේ ඉන්න ඕනේ. අනිත් පැත්තෙන් නිරන්තර අධීක්ෂණයට ලක්වෙනවා. මේ අවස්ථාව ගත්තහම පළමුපෙළ ආශ්‍රිතයින් නෙමෙයි අනෙකුත් අය 35,000ක් පමණ ලංකාවේ විවිධ ප්‍රදේශවලින් ගෘහස්ථ නිරෝධායනයට අනුගත වෙලා තියෙනවා. ඒ ක්‍රමය තවත් ශක්තිමත් කරලා දිනකට තුන් හතර සැරයක් අධීක්ෂණයකට ලක්කරන්න බලාපොරොත්තු වෙනවා. ජනතාවගේ නිරන්තර කැපවීම මේ සඳහා අවශ්‍යයි.“
