කථානායක මහින්ද යාපා අබේවර්ධන මහතාගේ ප්‍රධානත්වයෙන් පාර්ලිමේන්තුව අද (22) යළි රැස්වීමට නියමිතව තිබේ.
අද දිනයේ සිට පාර්ලිමේන්තු රැස්වීම් වේලාව වෙනසක් සිදුවන අතර, ඒ අනුව පෙරවරු 10.00ට පාර්ලිමේන්තු රැස්වීම ආරම්භ වීමට නියමිතය.
පස්වරු 5.30 දක්වා පාර්ලිමේන්තු කටයුතු සිදුවන අතර පස්වරු 4.30 සිට 5.30 දක්වා කාලය සභාව කල්තැබීමේ යෝජනාව විවාදයට ගැනීමට නියමිතව තිබේ.
9 වන පාර්ලිමේන්තුවේ ප්‍රශ්න ඇසීමේ කටයුතු ද අද දිනයේ සිට ආරම්භ වන අතර, පෙරවරු 10.00 සිට 11.00 දක්වා ඒ සඳහා කාලය වෙන්කර ඇත.
මේ අතර අද පස්වරු 2.30ට පොදු ව්‍යාපාර පිළිබඳ කාරක සභාව හෙවත් “කෝප්“ කමිටුවේ පළමු රැස්වීම පැවැත්වීමට නියමිතව තිබේ.
අද දිනයේ දී කෝප් කමිටුව සඳහා නව සභාපතිවරයෙකු තෝරාපත් කරගැනීමට නියමිතය.
ලබන 24 වන දින මහජන පෙත්සම් කාරක සභාව ද රැස්වීමට නියමිත අතර එදින ඒ සඳහා ද සභාපතිවරයෙක් තෝරා පත්කර ගැනීමට නියමිත බව වාර්තා වේ.
මේ අතර 20 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත අද දිනයේ පාර්ලිමේන්තුවට ඉදිරිපත් කිරීමට නියමිතව තිබේ.
අධිකරණ අමාත්‍ය ජනාධිපති නීතීඥ අලි සබ්රි මහතා විසින් 20 වන ආණ්ඩුක්‍රම ව්‍යවස්ථා සංශෝධනය පාර්ලිමේන්තුවට ඉදිරිපත් කරනු ඇති බව අමාත්‍ය මහින්ද අමරවීර මහතා සඳහන් කළේය.
ඊයේ පස්වරුවේ කැබිනට් මණ්ඩලය සහ ආණ්ඩු පක්ෂයේ මන්ත්‍රී කණ්ඩායම් රැස්වීම පැවති අතර එහිදී 20 වන ආණ්ඩුක්‍රම ව්‍යවස්ථා සංශෝධනය සම්බන්ධයෙන් දීර්ඝ වශයෙන් සාකච්ඡා වූ බව මහින්ද අමරවීර අමාත්‍යවරයා සඳහන් කළේය.
20 වන ආණ්ඩුක්‍රම ව්‍යවස්ථා සංශෝධනය පිළිබඳව ඉදිරි පියවර ගැනීම සඳහා පාර්ලිමේන්තු මන්ත්‍රී රාජිත සේනාරත්න මහතාගේ ප්‍රධානත්වයෙන් සමගි ජනබලවේගයෙන් විශේෂ කමිටුවක් පත්කර තිබේ.
ඊයේ පස්වරුවේ පාර්ලිමේන්තු සංකීර්ණයේ දී විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් පැවති මන්ත්‍රී කණ්ඩායම් රැස්වීමේ දී එම කමිටුව පත්කළ බව පාර්ලිමේන්තු මන්ත්‍රී තිස්ස අත්තනායක මහතා සඳහන් කළේය.
