ගම්වදින හිවලුන් නිසා භීතියට පත් තවත් ගමක්
ගම්වදින හිවලුන් නිසා ජනතාව භීතියට පත්ව සිටින හොරණ, මිල්ලනිය මුවපට්ටිය ගම්මානයක් පිළිබඳව පසුගිය සතියේ වාර්තා කළේය.
එම ගැටලුව විසඳී නොමැති පසුබිමක තවත් එවැනිම ගම්මානයක් පිළිබඳව හොරණ ප්‍රදේශයෙන් වාර්තා වුණි.
ඒ මුවපට්ටිය ගම්මානයට කිලෝමීටර් 17ක් ඈතින් පිහිටා ඇති හොරණ, ඕවිටියාගල ගම්මානයයි.
එම ගම්මානයේ වැසියන්ද, හිවල් භීතිය නිසා පීඩා විඳින්නට පටන් ගෙන තිබේ.
දිනක් හිවලකු එම ගම්මානයේ නිවසකට කඩා වැඳී නිවෙස් හිමියා සපා කෑමට තැත්කර ඇති අතර ඔහු සිදුකළ පහරදීමෙන් එම හිවලා මිය ගොස් තිබුණි.
පසුව වනජීවි දෙපාර්තමේන්තුවේ නිලධාරීන් පැමිණ මියගිය හිවලාගේ හිස පරීක්ෂණයක් සඳහා රැගෙන ගොස් තිබූ අතර එහිදී අනාවරණ වී ඇත්තේ මියගිය සත්ත්වයාට ජලභීතිකාව වැළදී තිබූ බවය.
මිල්ලනිය මුවපට්ටිය ගම්මානයේ ජනතාව හිවල් භීතිය නිසා පීඩාවට පත්ව සිටින ආකාරයත්, හිවලුන් ජීවිත දෙකක් බිලි ගෙන ඇති ආකාරයත් පසුගිය සැප්තැම්බර් 14 වැනිදා කළ අනාවරණයෙන් පසු කළුතර දිස්ත්‍රික් ලේකම්වරයාගේත්, මිල්ලනිය ප්‍රාදේශීය ලේකම්වරයාගේ මෙන්ම විෂයභාර අමාත්‍ය සී. බී රත්නායක මහතාගේද අවධානය ඒ වෙත යොමු වූ අතර ගැටලුව දැනුම්දීම සඳහා 1992 විශේෂ දුරකථන අංකයක් ද හඳුන්වා දුනි.
එහෙත් හිවලුන් ගම්වැඳීම තවමත් සිදුවන බැවින් මිල්ලනිය, මුවපට්ටිය ගම්වැසියන්ට තැනින් තැන ගිනිමැල ගසමින් රැය පහන් කිරීමට සිදුව තිබේ.
මෙවන් පසුබිමක හොරණ වැල්ලපිටිය පොදු ක්‍රීඩාංගණයේදී ජලභීතිකා රෝගය මැඩලීමට එන්නත් කිරීමේ වැඩසටහනක්ද මේ වන විට ක්‍රියාත්මක කර ඇති බව වාර්තා වේ.
