සාදයක් වටලා මත්කුඩු සමඟ 9දෙනෙකු අත්අඩංගුවට
ගාල්ල තෙලිකඩ දීපගොඩවත්ත ප්‍රදේශයේ පවත්වමින් සිටි මිතුරු සාදයක් වැටලීමේදී මත් මුද්දර සහ මත්කුඩු භාවිත කරමින් සිටි සැකකරුවන් නව දෙනෙකු තෙලිකඩ පොලිස් නිලධාරීන් විසින් අත්අඩංගුවට ගෙන ඇත.
ඊයේ (26) පස්වරුවේ සිදුකළ වැටලීමේදී රුපියල් එක්ලක්ෂ හැටදහසක පමණ වටිනාකමකින් යුත් මත් මුද්දර හතලිහක් රුපියල් එක්ලක්ෂ හතලිස් දහසක් පමණ වටිනාකමකින් යුත් මත් පෙති විස්සක් සහ රුපියල් ලක්ෂ දෙකක පමණ වටිනාකමකින් යුත් මත්කුඩු ද පොලිස් භාරයට ගෙන තිබේ.
අත්අඩංගුවට පත් සැකකරුවන් වයස අවුරුදු 25ත් 30ත් අතර පසුවන්නන් වන අතර ඔවුන් මහනුවර සහ කොළඹ යන ප්‍රදේශවල පදිංචිකරුවන් බව අනාවරණය වී ඇත.
සැකකරුවන් බද්දේගම මහෙස්ත්‍රාත් අධිකරණය හමුවට අද (27) ඉදිරිපත් කිරීමට නියමිතය.
