කුරුණෑගල රෝහල ඉදිරිපිට එම රෝහලේ වෛද්යවරු ඇතුළු රෝහල් කර්යමණ්ඩල අද (24) උදෑසන විරෝධතාවයක නියැලුණි.
එම විරෝධතාවය අතරතුර දී මාර්ගයේ ගමන් ගත් රියදුරන් හා විරෝධතාකරුවන් අතර උණුසුම් තත්ත්වයක් ද හට ගැනුණි.
පසුගිය 19 වනදා වෛද්යවරයෙකුට සිදුකළ පහරදීමට සම්බන්ධයෙන් සැකකරුවන් අත්අඩංගුවට ගන්නා ලෙස ඉල්ලා කුරූණෑගල රෝහල ඉදිරිපිට අද විරෝධතාවයක් පැවැත් වුණි.
අදාළ විරෝධතාවය හේතුවෙන් කොළඹ – කුරුණෑගල ප්රධාන මාර්ගය කුරුණෑගල රෝහල අසලින් පැය භාගයකට ආසන්න කාලයක් අවහිර වී තිබූ අතර එම මාර්ගය දැඩි රථවාහන තදබදයක් හටගෙන තිබුණි.
අදාළ සැකකරුවන් අත්අඩංගුවට ගන්නා බව කුරුණෑගල සහකාර පොලිස් අධිකාරීවරයා විසින් ලබාදුන් පොරොන්දුව මත විරෝධතාකරුවන් විසිර ගිය බව වාර්තා වෙයි.
මේ අතර අදාළ සිදුවීම සම්බන්ධයෙන් කුරුණෑගල රෝහලේ වෛද්යවරුන් ඇතුළු කාර්ය මණ්ඩලය වැඩ වර්ජනයකද නිරත විය.
එම වැඩ වර්ජනය හේතුවෙන් අද උදෑසන රෝහලේ බාහිර රෝගී අංශය ඇතුළු අංශ කිහිපයක කටයුතු ද ඇනහිට තිබුණි.
ඒ හේතුවෙන් රෝහලවෙත පැමිණි රෝගීන් ඇතුළු පිරිස දැඩි පීඩාවට පත්වූ බව අප වාර්තාකරු පැවසීය.
