නැවතත් වරක් ජනාධිපතිවරණයක් අවශ්‍ය බව විපක්ෂ නායක සජිත් ප්‍රේමදාස මහතා පවසයි.
සමගි ජන බලවේගය අද (15) කොළඹදී පැවැත්වූ දැවැන්ත විරෝධතා පෙළපාලිය අමතමින් සජිත් ප්‍රේමදාස මහතා ඒ බව පැවසීය.
“රට විනාශයි – දැන් ඇති – තවත් වනසන්න දෙන්න බෑ” යන තේමාව යටතේ එය සංවිධානය කර තිබුණි.
කොළඹ ස්ථාන දෙකකින් විරෝධතා පාගමන ආරම්භ විය.
එක් කණ්ඩායමක් සමගි ජන බලවේගයේ නායක, විපක්ෂ නායක සජිත් ප්‍රේමදාස මහතාගේ මූලිකත්වයෙන් කොළඹ ජාතික පුස්තකාලය අසලින් පාගමන ආරම්භ කර තිබුණි.
එය කොල්ලුපිටිය හරහා ජනාධිපති ලේකම් කාර්යාලය අසලට පැමිණ තිබුණි.
මාලිගාවත්ත පී.ඩී. සිරිසේන ක්‍රීඩාංගණය අසලින් අනෙක් පාගමන ආරම්භ වු අතර එය පිටකොටුව හරහා ජනාධිපති ලේකම් කාර්යාලය අසලට ළඟාවිය.
එහිදී ජනාධිපති ලේකම් කාර්යාලය තුළට විරෝධතාකරුවන් ඇතුළුවීමට උත්සාහ කිරීමේදී උණුසුම් තත්ත්වයක් හට ගෙන තිබුණි.
පසුව විපක්ෂ නායක සජිත් ප්‍රේමදාස මහතා පැමිණ සිටි විරෝධතාකරුවන් ඇමතීය.
විපක්ෂ නායක සජිත් ප්‍රේමදාස මහතා,
“එදා කිව්වේ අතිගරු ජනාධිපතිතුමා කියලා. අද කියන්නේ ඇති ගරු ජනාධිපතිතුමා කියලා. දැන් අවුරුදු 2ක් ජනතාව දුක්විඳිනවා. තවත් මේ දුක උහුලන්න පුළුවන්ද ? අපි ආවේ රට කාබාසිනියා කරපු ආණ්ඩුවට ගෙදර යන්න කියන්න. ආණ්ඩුව ගෙදර යවන්න ඔබ සූදානම්ද?”
“දැන් එක එක්කෙනා එනවා අපිත් එක්ක දේශපාලන ඩීල් දාන්න. මෙච්චරකල් ඔය දාපු ඩීල් සිදුවුණේ කොහොමද? ඇමතිකම්, සභාපතිකම්, නිලතල දීම මත ඩීල් දේශපාලනය සමගි ජන බලවේගය කරන්නේ නෑ.”
“මම අවසාන ඉල්ලීමක් කරනවා. කරුණා කරලා ගෝඨාභය රාජපක්ෂ ජනාධිපතිවරයා රටේ ජනතාව අනාථ කරන්නැතුව පිං සිද්ධවෙයි.. එක්කෝ ගෙදර යන්න. එහෙම නැත්තම් ජනතාවට ඒ තීන්දුව ගන්න ජනාධිපතිවරණයක්..”
“අපිට ඕනේ නැවතත් වරක් ජනාධිපතිවරණයක්. වෙන මොනවත් නෙමෙයි. පුළුවන් නම් ජනාධිපතිවරණය පවත්වන්න.. එදාට රටේ ජනතාව වැඩ පෙන්වයි. මේ ආණ්ඩුවට මේ රටේ වෙන විකල්පයක් නෑ. සමගි ජන බලවේගයයි විකල්පය.”
