පවතින ඩොලර් හිඟය හේතුවෙන් මාර්තු 31 වැනිදා සිට ක්‍රියාත්මක වන පරිදි විදේශ රටවල තානාපති කාර්යාල දෙකක් සහ කන්සියුලර් කාර්යාලයක් වසා දැමීමට තීරණය කර ඇතැයි වාර්තා වෙයි.
ඒ අනුව ඉරාකයේ බැග්ඩෑඩ් නුවර පිහිටි ශ්‍රී ලංකා තානාපති කාර්යාලය,නෝර්වේ රාජ්‍යයේ ඔස්ලෝහි පිහිටි ශ්‍රී ලංකා තානාපති කාර්යාලය සහ ඔස්ට්‍රේලියාවේ සිඩ්නි නුවර පිහිටි කන්සියුලර් කාර්යාලය වසා දැමීම සම්බන්ධයෙන් අද පැවැත්වෙන කැබිනට් මණ්ඩල රැස්වීමේදී සාකච්ඡා කිරීමට නියමිත බව විදේශ කටයුතු අමාත්‍යාංශ ආරංචි මාර්ග පවසයි.
මේ සම්බන්ධයෙන් අදහස් දැක්වූ මහාචාර්ය ජී.එල්.පීරිස් – විදේශ කටයුතු අමාත්‍ය
“එවා තාවකාලික පියවර. රටේ ආර්ථික තත්ත්වය සහ අපට තිබෙන මුල්‍ය සම්පත් අනුව විටින් විට අපි සලකා බලනවා. සිඩ්නි නගරයේ ඒක තානාපති කාර්යාලයක් නෙමේ කන්සියුලර් කාර්යාලයක්. සමහර ඒවා අපි වහන්න තීරණය කරලා. අවුරුද්දකට විතර පස්සේ මුදල් තත්ත්වය අනුව ඒ ගැන සලකාබලලා තීරණ ගැනීමට පුළුවන් වෙයි. දැන් ජර්මනියේ ෆ්‍රෑන්ක්ෆර්ට් කන්සියුලර් කාර්යාලයක තාවකාලිකව වහලා දමන්න තීරණය කරලා තියෙනවා. වැඩකටයුතු අපි පවරනවා බර්ලින් නගරයේ තියෙන තානාපති කාර්යාලයට. එවායෙන් ලොකු ප්‍රශ්න ඇති වෙන්නේ නෑ”.
මේ අතර ඩොලරයේ අගය ඉහළ යාම, ඒ හා බැඳුණු ඉන්ධන මිල ඇතුළු කරුණු රැසක් හේතුවෙන් අත්‍යවශ්‍ය භාණ්ඩ මිල තවදුරටත් ඉහළ යමින් පවතී.
අදත් අප වෙළෙඳපොළේ නිරීක්ෂණයකදී අනාවරණය වූයේ සහල් කිලෝවක අවම තොග මිල රුපියල් සියය ඉක්මවා යද්දී සහල් කිලෝවක සිල්ලර මිල රුපියල් 150ත් – 260ත් අතර අගයක පවතින බවය.
එමෙන්ම ආසන්න දින කිහිපයක් තුළ මිලි ලීටර් 750ක පොල්තෙල් බෝතලයක මිල රුපියල් 680ක් තෙක් වාර්තාගත ලෙස ඉහළ ගොස් තිබේ.
කුකුළු මස්, මාළු, බිත්තර මිල ගණන් ඉහළ යද්දී කරවල මිල ගණන් ද රුපියල් 50ත් 60ත් අතර මිලකින් වැඩි වී තිබේ.
