සෞඛ්‍ය ක්ෂේත්‍රය දැඩි අර්බුදයක
සෞඛ්‍ය ක්ෂේත්‍රයේ හදිසි සේවා පවත්වාගෙන යාම සඳහා ක්‍රමවත් වැඩපිළිවෙලක් සකස් කරන ලෙස අමාත්‍යාංශ ලේකම්වරයාට දැනුම්දී ඇති බව රජයේ වෛද්‍ය නිලධාරින්ගේ සංගමය පවසයි.
එම සංගමයේ වෛද්‍ය හරිත අලුත්ගේ මහතා පැවසුවේ, එසේ නොකරන්නේ නම් සෞඛ්‍ය ක්ෂේත්‍රය දිනෙන් දින කඩාවැටීමකට ලක්වනු ඇති බවය.
“අද වෙනකොට රෝහල් ගණනාවක් සම්පුර්ණ අඩපණ වීමක් දක්වා ටිකෙන් ටික ගමන් කරමින් ඉන්නවා. ඉතාම නරක තත්ත්වයක් එන්නේ. ඒ නිසා ඉදිරි කාලයේ මෙහෙම ඉදිරියට ගියොත් වෙනසක් කරන්නේ නැතුව, අත්‍යවශ්‍ය ප්‍රතිකාර ටිකත් මිනිසුන්ගේ ජීවිත බේරගන්න තියෙන හදිසි ප්‍රතිකාර ටිකත් කඩාවැටීමේ අවධානම මතුවෙලා තියෙනවා. සෞඛ්‍ය ලේකම්ට අපි යෝජනා කරලා තියෙනවා අත්‍යවශ්‍ය අවම සේවකයින් ගෙනල්ලා මේ රාජකාරිය කරන්න. ඒ වගේම හදිසි ප්‍රතිකාර පවත්වාගෙන යෑමට නිශ්චිත මාර්ගෝපදේශයක් පවත්වාගෙන යෑමට කටයුතු කරන්න කියලා.”
සෞඛ්‍ය ක්ෂේත්‍රයේ පවතින අර්බුධකාරි තත්ත්වය සම්බන්ධයෙන් පැහැදිලි කරන රජයේ හෙද නිලධාරින්ගේ සංගමයේ සභාපති සමන් රත්නප්‍රිය මහතා,
“අද වෙනකොට සෞඛ්‍ය සේවකයින් 25%ක් විතර රාජකාරියට වාර්තා කරන්නේ නෑ නෙමෙයි එන්න බෑ. යම් ප්‍රමාණයකට ඖෂධ හිඟයක්, සේවාවල තියෙන උපකරණ හිඟයක් ලෙස අර්බුදයක් රට තුළ තියෙද්දි ප්‍රවාහන ගැටලුව නිසා සේවකයින්ට පැමිණීමට තියෙන අපහසුතාවය උඩ සෞඛ්‍ය සේවාව යම් ප්‍රමාණයකට බිඳවැටෙන තත්ත්වයක් උද්ගත වෙමින් තියෙනවා.”
