මෙවර අලුත් අවුරුද්ද පාට, පක්ෂ, ජාති, ආගම් භේද පසෙකලා නව දැක්මකින් රට වෙනුවෙන් ඉදිරියට යාමේ නව ඇරඹුමක් කරගත යුතු බව ජනාධිපති රනිල් වික්‍රමසිංහ මහතා පවසයි.
අලුත් අවුරුදු සුභ පැතුම් පණිවිඩයක් නිකුත් කරමින් ජනාධිපතිවරයා පෙන්වාදෙන්නේ පසුගිය වසරේ සිංහල හා දෙමළ අළුත් අවුරුද්ද උදාවන විට රටේ ජනතාව ජිවන අරගලය පවත්වාගෙන යාමේ අර්බුදයකට මුහුණ දී සිටි බවය.
නමුත් මෙවර අවුරුද්ද කිසියම් සහනදායි පරිසරයක් නිර්මාණය කරමින් උදාවන හෙයින් එළඹෙන මීළඟ අවුරුද්ද අදටත් වඩා භාග්‍යවත් සහ සමෘද්ධිමත් කර ගැනීමට අප උත්සහ කළ යුතු බව ජනාධිපතිවරයා පෙන්වාදෙයි.
ජනාධිපතිවරයාගේ සුබ පැතුම් පණිවුඩය,
“සූර්යයා මීන රාශියෙන් මේෂ රාශියට සංක්‍රමණයත් සමඟ උදාවන සිංහල හා දෙමළ අලුත් අවුරුද්ද මෙරට සිංහල සහ දෙමළ ජනතාවට ඉතාමත් ප්‍රීතිමත් අවස්ථාවකි. සියලු ජනතාව එකම නැකතකට චාරිත්‍ර ඉටු කරන්නේ සෞභාග්‍යයේ සහ සශ්‍රිකත්වයේ අපේක්ෂාවෙන් පෙරදැරිවය. පසුගිය වසරේ සිංහල හා දෙමළ අලුත් අවුරුද්ද එළැඹෙද්දී අප සැවොම මැදිව සිටියේ දැවැන්ත අර්බුදයකටය. අවුරුදු සැමරීම පසෙක ලා, එදිනෙදා ජීවිතය පවත්වාගෙන යෑමේ අරගලයකට අපි මැදිව සිටියෙමු. නමුත් මේ අලුත් අවුරුද්ද එළැඹෙනුයේ අප සැමටම කිසියම් සහනදායී පරිසරයක් උදා කරමිනි. අප වෙහෙසිය යුත්තේ, අප උත්සාහ කළ යුත්තේ, එළැඹෙන මීළඟ අලුත් අවුරුද්ද අදටත් වඩා භාග්‍යවත් හා සමෘද්ධිමත් කර ගැනීමටය. එම ප්‍රාර්ථනාව මුදුන්පත් කරගත හැකි වනුයේ අප සියලුදෙනා එකට එක්ව එක මවකගේ දරුවන් ලෙස එක මගක ඉදිරියට යාමෙන් පමණි. එබැවින් පක්ෂ, පාට, ජාති, ආගම් බේද පසෙකලා නව දැක්මකින් රට වෙනුවෙන් ඉදිරියට යාමට මෙවර අලුත් අවුරුද්ද නව ඇරඹුමක් කර ගත යුතු අතර මේ අලුත් අවුරුද්ද පමණක් නොව අනාගතය ද සුබ වනුයේ එවිටය.”
මේ අතර රට මුහුණදුන් ආර්ථික අර්බුදය හමුවේ ගොවි ජනතාව රට බත බුලතින් සරි කරන්නට අභියෝගාත්මකව කළ මෙහෙය මෙවර අලුත් අවුරුද්දේදී කෘතවේදීව සිහිපත් කළ යුතු බව අග්‍රාමාත්‍ය දිනේෂ් ගුණවර්ධන මහතා පවසයි.
මේ අතර රටේ ජනතාවට වසර දෙකකට පසු යම් සහනදායී තත්වයක් යටතේ සැමරීමට අවස්ථාව හිමිවු මෙවර අලුත් අවුරුද්දේ දී සාමකාමීව කටයුතු කළ යුතු බව අස්ගිරි පාර්ශ්වයේ මහා නායක පූජ්‍ය වරකාගොඩ ඤානරතන හිමියන් පැවසීය.
මල්වතු පාර්ශවයේ අනුනායක පුජ්‍ය දිඹුල්කුඹුරේ විමලධම්ම හිමි ප්‍රකාශ කළේ සියලු ජාතීන් එකට එක්ව රටේ පවතින අර්බුද විසදීම සදහා දායකත්වය ලබාදීමට මෙවර අලුත් අවුරුද්දේ දී අදිටන් කළ යුතු බවය.
