චීනයේ විදේශ කටයුතු උප අමාත්‍ය සුන් වෙයිඩොන්ග් ඇතුළු එරට විදේශ කටයුතු අමාත්‍යාංශයේ දූත පිරිසක් චීන – ශ්‍රී ලංකා දෙරටේ 12 වැනි රාජ තාන්ත්‍රික උපදේශන වටයට සහභාගී වීම සඳහා දිවයිනට පැමිණ සිටින අතරතුර විපක්ෂ නායක සජිත් ප්‍රේමදාස මහතා සමග හමුවක් අද (30) සිදුවිය.
ද්විපාර්ශවීය වශයෙන් පවත්නා සබඳතා ශක්තිමත් කරගැනීම පිළිබඳව එහිදී විශේෂ අවධානයක් යොමු කළ අතර, ශ්‍රී ලංකාවේ ආර්ථික දියුණුවට අවශ්‍ය කරන සහයෝගය ද ලබා දෙන ලෙසත්, නිෂ්පාදන කර්මාන්ත විප්ලවය ඉදිරි අදියරට රැගෙන යාම සඳහා වන සහයෝගය ලබාදෙන ලෙසත්, විපක්ෂ නායකතුමා එහිදී ඉල්ලා සිටියේය.
චීන ආර්ථික විප්ලවය පිළිබඳව ගත හැකි ආදර්ශ මෙන්ම කලාපීය සාමය සහ සංහිඳියාව පිළිබඳව ද එහිදී සාකච්ඡාවට බඳුන් විය. කලාපීය සාමය සහ සංහිඳියාව මෙන්ම ස්ථාවරත්වය ශක්තිමත් කරන විදේශ සබඳතා ගොඩනගා ගැනීම පිළිබඳව ද එහිදී විපක්ෂ නායකතුමා සහ චීන නියෝජ්‍ය විදේශ අමාත්‍ය තුමා අතර සාකච්ඡාව සිදුවිය.
