තෙල් මිල වැඩිකිරීම වහාම අත්හිටුවා ජනතාවට සහනයක් සලසන ලෙස සමගි ජනබලවේගය ආණ්ඩුවෙන් ඉල්ලීමක් කරයි.
නිවේදනයක් නිකුත් කරමින් සමගි ජනබලවේගයේ මහලේකම් රංජිත් මද්දුම බණ්ඩාර මහතා පෙන්වාදෙන්නේ යළිත් වතාවක් තෙල් මිල වැඩි කරමින් ජනතාව කබලෙන් ළිපට ඇද දමා ඇති බවය.
ජනතාව නින්දට වැටෙන රාත්‍රී කාලයේ ගිවිසුම් අත්සන් කිරීම, භාණ්ඩ මිල ඉහළ දැමීම ආණ්ඩුවේ නවතම ක්‍රියා පිළිවෙත බව රංජිත් මද්දුම බණ්ඩාර මහතා නිකුත් කළ නිවේදනයේ සඳහන් වේ.
මේ අතර සිය පාලනයක් යටතේ රටේ පවතින ආර්ථික අර්බුදයට විසඳුම් ලබාදෙන බව විපක්ෂ නායක සජිත් ප්‍රේමදාස මහතා පවසයි.
කොළඹ දී මාධ්‍යවේදීන් නැඟු ප්‍රශ්නවලට පිළිතුරු ලබාදෙමින් විපක්ෂ නායක සජිත් ප්‍රේමදාස මහතා එම අදහස් පළ කළේය.
එහිදී අදහස් දැක්වු සජිත් ප්‍රේමදාස මහතා,
“ජනතාව නිවැරදි තීන්දුව ගත්තා නම් මේ වගේ මහා ඛේදවාචකයකට ජනතාව ලක්වෙන්නේ නැහැ. අපේ පාලනයක් තුළ අපි නිවැරදි ගමනක් යන්නට තමා සැලසුම් කරලා තිබුණේ. ආපු හැටියේම පටන් ගත්තේ බිලියනපතියන්ට බදු සහන දීලානේ. එතැනින් තමා මේ ආර්ථික ඛේදවාචකය නිර්මාණය වුණේ.”
ප්‍රශ්නය – ඔබතුමන්ලාගේ පක්ෂයෙන් වෙනම පස්දෙනෙක් ඉදිරිපත් වෙන්න බලාපොරොත්තුවක් නැද්ද ?
“ඔබතුමා කියන්නකෝ ඔබතුමාගේ ආණ්ඩුවට දැන් මැතිවරණයක් ප්‍රකාශයට පත්කරන්න කියලා. එතකොට හැමෝගේම වැඩ බලාගන්න පුළුවන්. මම ඔබතුමන්ලාගෙනුත් ඉල්ලීමක් කරන්නේ, ඔබතුමාගේ රාජකාරියත් කරන්න. අද ඔබතුමන්ලාගේ රාජකාරිය තමා ඡන්දයක් තියන්න කියන දේ ආණ්ඩුවට කියන්න. මොකද අද ඒ තරමටම මිනිස්සුන්ට ජීවත්වෙන්න බෑ. ඡන්දයක් අවශ්‍යයි කියන මතය මාධ්‍ය ගොඩනගන්න. ඒක තමා ජනතා මතය ගොඩනැගීම.”
