දැන් ජනතාව තේරුම් අරන් තියෙනවා රනිල් නැතුව බෑ කියලා -රංගේ බණ්ඩාර
එක්සත් ජාතික පක්ෂ ජාතික ලැයිස්තු මන්ත්‍රී ධුරය එම පක්ෂයේ නායක රනිල් වික්‍රමසිංහ මහතාට ලබාදීම සම්බන්ධයෙන් යෝජනා රැසක් ඉදිරිපත් වී ඇති බව එම පක්ෂයේ නියෝජ්‍ය නායක රුවන් විජේවර්ධන මහතා පවසයි.
ඔහු පෙන්වාදෙන්නේ ඒ සම්බන්ධයෙන් අවසන් තීරණය අද (23) දිනයේ ප්‍රකාශයට පත්කිරීමට බලාපොරොත්තු වන බවය.
මහනුවර ප්‍රදේශයේ පැවති මාධ්‍ය හමුවක දී රුවන් විජේවර්ධන මහතා මෙම අදහස් පළ කරමින් වැඩිදුරටත් මෙසේ පැවසීය.
“පසුගිය සතියේ අපි රැස්වුණා සිරිකොත දී. එහිදී නායකතුමාගේ ප්‍රධානත්වයෙන් රැස්වෙන විටත් අපේ හිටපු මන්ත්‍රීවරු ගණනාවක් යෝජනා කෙරුවේ, රනිල් වික්‍රමසිංහ මහතා මන්ත්‍රීධූරයට යන්න අවශයයි කියන එක. ඒ අවස්ථාවේ දී එතුමා කිව්වා යන්නේ නෑ කියලා. නමුත් කොහොමට ත් අපි සඳුදත් ඒ ගැන සාකච්ඡා කරලා ප්‍රශ්නයක් ඇති නොවන විදියට සුදුසු පුද්ගලයෙක් පාර්ලිමේන්තුවට යවනවා. ඒකේ කිසි ප්‍රශ්නයක් නෑ. “
මේ අතර හිටපු පාර්ලිමේන්තු මන්ත්‍රී පාලිත රංගේ බණ්ඩාර මහතා ද මෙහිදී අදහස් පළ කරමින් මෙසේ සඳහන් කළේය.
“අපි 19 දෙනෙක් එක්වුණ මේ සාකච්ඡාවේ දී අපේ මහලේකම් තුමා ඇතුළු සියලු දෙනා හිටියා, මේ 19 දෙනාගෙන් කිසිදු තැනැත්තෙකු එයට එරෙහිව කතා කළේ නෑ. මේකට සපෝට් කරලා තමයි හැමදෙනාටම කතා කළේ. මේ අවස්ථාවේ පාර්ලිමේන්තුවට යා යුත්තේ රනිල් වික්‍රමසිංහ මැතිතුමා කියලා. කලකදි රහලු කලකදි වහ වෙනවාලු කියනවා. දැන් රනිල් වික්‍රමසිංහ මහතා වහක් වෙලා හිටියා සමහර අයට. රනිල් නැතුව රට ගියේ අවුරුද්දයි දැන් පාන්කුඩු ටිකක්වත් ගන්න නෑ. මෙන්න රටට වෙලා තියෙන හරිය. එදා මංගලලා ගෙනාවේ රනිල්ට බෑ කියලා දැන් ජනතාව තේරුම් අරන් තියෙනවා රනිල් නැතුව බෑ කියලා.“
