පරිසරය ආරක්ෂා කිරීම සඳහා ප්‍රතිපත්තිමය
වැඩපිළිවෙළක්…..
කොළඹ දිස්ත්‍රික්කය ඇතුළු මුළු රටේම පරිසරය ආරක්ෂා කිරීම සඳහා
ප්‍රතිපත්තිමය වැඩපිළිවෙළක් දැනටමත් සකස්කොට ඇතැයි ශ්‍රී ලංකා
පොදුජන පෙරමුණේ නායක අග්‍රාමාත්‍ය මහින්ද රාජපක්ෂ මහතා පවසයි.
(2020.07.22) පස්වරුවේ කොලොන්නාව කොටිකාවත්ත ප්‍රදේශයේ
පැවති හමුවක් අමතමින් අග්‍රාමාත්‍යවරයා සඳහන් කළේ දෙදහස්
පහළොව වසරට පෙර ක්‍රියාත්මකකල කොළඹ නගරය අලංකාර කිරීමේ
වැඩපිළිවෙළ නැවත ආරම්භ කරන බවයි.
කොළඹ දිස්ත්‍රික්කය හා සමගාමීව රට පුරා සියලුම ප්‍රදේශ ආවරණය
වන පරිදි පරිසරය ආරක්ෂා කිරීමේ ප්‍රතිපත්තිමය වැඩපිළිවෙළක
අවශ්‍යතාවය කලක පටන් සමාජයේ කතා බහට ලක්වූ මාතෘකාවක් වී
තිබේ.
තම රජය යටතේ සැමවිටම පරිසරය ආරක්ෂා කිරීමේ ප්‍රතිපත්තිමය
වැඩසටහන්වලට මූලිකත්වය ලබාදුන් බව කී අමාත්‍යවරයා සංවර්ධන
ක්‍රියාදාමයන් දියත් කරන අතරතුර රටේ පරිසරය ආරක්ෂා කිරීම ද
රජයක වගකීමක් බව සඳහන් කළේ ය.
ජනාධිපතිවරයාගේ සැලසුම් ක්‍රියාත්මක කිරීමේ බලයක් පාර්ලිමේන්තුව
තුළ හිමිකර ගැනීම වර්තමානයේ ඉතා වැදගත් වන අතර, ඒ සැලසුම්
ක්‍රියාත්මක කිරීම සඳහා හැකියාවක් මෙන්ම ශක්තියක් තිබෙන පිරිසක්
පාර්ලිමේන්තුවට පත්කර ගතයුතු බව ද අග්‍රාමාත්‍යවරයා මෙහිදී පෙන්වා
දුන්නේය.
ඇතැම් දේශපාලන පක්ෂ මේ වෙනවිටත් දෙකට බෙදී, රට ද බෙදීමේ
උත්සාහයක නිරත වන බව කී අග්‍රාමාත්‍යවරයා එවැනි කුමන්ත්‍රණ
පරාජය කොට රට ගොඩනැංවීම වෙනුවෙන් ශ්‍රී ලංකා පොදුජන පෙරමුණ
වටා එක්වන්නයි ජනතාවගෙන් ඉල්ලා සිටියේ ය.
