චීනය විසින් ලොව බොහෝ රටවල් “ණය උගුලක” හසු කර ඇතැයි එක්සත් ජනපද භාණ්ඩාගාර ලේකම් ජැනට් යෙලන් චෝදනා කළාය.
ඊට ප්‍රතිචාර දක්වමින් චීනය පවසන්නේ ඇය කර ඇත්තේ, “වගකීම් විරහිත” ප්‍රකාශයක් බවය.
පසුගිය බදාදා එක්සත් ජනපද භාණ්ඩාගාර ලේකම්වරිය පැවසුවේ චීනය ලොවපුරා සිදුකරන කටයුතු විශේෂයෙන් “ණය දෙන ක්‍රියාවලිය” ගැන තමන් විමසිල්ලෙන් සිටින බවය.
එක්සත් ජනපද ව්‍යවස්ථාදායකයේ නියෝජිතයින් පිරිසක් අමතමින් ඇය ඒ බව පැවසුවාය. “විශේෂයෙන් ජාත්‍යන්තර ආයතන සඳහා සහ සංවර්ධනය වෙමින් පවතින රටවලට ඇතිව ඇති චීන බලපෑම පාලනය කිරීමට වොෂින්ටනය දැඩිලෙස කැපවී කටයුතු කරනවා.”
පසුගිය කාලයේදී දියුණුවෙමින් පවතින රටවල යටිතල පහසුකම් සංවර්ධනය සඳහා ඩොලර් බිලියන ගණනක් ණයට ලබාදීමට චීනය කටයුතු කළේය.
නමුත් 2016 පසු ණය ලබාදීම ක්‍රමයෙන් අඩුවිය.
එසේ ණය මත සංවර්ධන කළ බොහෝ ව්‍යාපෘති අසාර්ථක වී තිබේ. ඒ හේතුවෙන් බොහෝ රටවලට ණය නැවත ගෙවීම දැඩි අර්බුදයක් වී තිබේ.
නමුත් චීනය චෝදනා කරන්නේ අමෙරිකානු මහ බැංකුව විසින් ප්‍රතිපත්ති පොලි අනුපාතික නොසිතූ ලෙස ඉහළ දැමීම හේතුවෙන් එම තත්ත්වය ඇතිවී ඇති බවය.
චීනය තමන් ලබාදුන් ණය ප්‍රතිව්‍යුහගත කිරීම සඳහා සැම්බියාව, ඝානාව සහ ශ්‍රී ලංකාව සමග සාකච්ඡා කරමින් සිටියි. නමුත් එම ක්‍රියාවලියට විවිධ බාධා ඇතිකරන බවට විවිධ පාර්ශ්ව චීනයට චෝදනා කරයි.
ඊට ප්‍රතිචාර දක්වමින් චීනය පවසා ඇත්තේ ලෝක බැංකුව සහ ජාත්‍යන්තර මූල්‍ය අරමුදල ද ණය සහන ලබාදිය යුතු බවය.
