රෝහලෙන් පැනගිය පුද්ගලයා මහල් නිවාස සංකීර්ණයක දී සොයාගනී
කොස්ගම, සාලාව රෝහලෙන් පැනගිය කොවිඩ් ආසාදිත බවට සැකකෙරෙන පුද්ගලයා බොරැල්ල ප්රදේශයේ මහල් නිවාස සංකීර්ණයක සිටිය දී සොයා ගෙන තිබේ.
අද උදෑසන එම පුද්ගලයා රෝහලේ පැන ගොස් තිබු අතර, ඔහු 26 හැවිරිදි සේදවත්ත වැල්ලම්පිටිය ප්රදේශයේ පදිංචිකරුවෙකි.
ඔහු සොයා සිදුකළ විශේෂ මෙහෙයුමකින් අනතුරුව, බොරැල්ල ප්රදේශයේ සහස්පුර නිවාස සංකීර්ණයේ, 13 වන තට්ටුවේ නිවසක සිටිය දී සොයාගත් බව පොලිස් මාධ්ය ප්රකාශක නියෝජ්ය පොලිස්පති අජිත් රෝහණ මහතා පැවසීය.
මේ වන විට අදාළ ස්ථානයට පොලීසිය හා සෞඛ්ය බලධාරීන් ගොස් ඇති අතර, ඔහු නැවත රෝහලගත කිරීමට කටයුතු කර ඇතැයි ද ඒ මහතා කියා සිටියේය.
“විශේෂයෙන්ම මොහු නිරෝධායන හා රෝග වැළැක්වීමේ ආඥා පනත මෙන්ම ඊට අදාළ රෙගුලාසි යටතේ වරදක් කර තිබෙනවා. එනම් යම් පුද්ගලයෙකුට යම් ස්ථානයක රැඳී සිටීමට ප්රතිකාර කිරීමට නියෝග කර තිබිය දී එයින් පළායෑම ඒ අනුව ප්රතිකාර හා නිරෝධායන ක්රියාවලිය අවසන් වීමෙන් පසුව ඔහුට විරුද්ධව නිරෝධායන හා රෝග වැළැක්වීමේ ආඥා පනත යටතේ, නඩු පැවරීමට බලාපොරොත්තු වෙනවා. මේ පැනයෑම සම්බන්ධයෙන් කොස්ගම, ග්රෑන්ඩ්පාස් සහ බොරැල්ල පොලිස් ස්ථාන මඟින් මේවන විට පරීක්ෂණයක් ආරම්භ කර තියෙනවා. කෙසේ වෙතත් ඔහුට විරුද්ධව නීතිය ක්රියාත්මක කරන්නේ රෝගය ආසාදනය වී ඇත්නම් එයින් සම්පූර්ණයෙන් ප්රතිකාර ලැබීමෙන් පසුව සහ නිරෝධායන ක්රියාවලිය අවසන් වීමෙන් පසුවයි.“
