ලක්ෂ 6ක් වන සියලුම විශ්රාමික රජයේ සේවකයන් සඳහා අග්රහාර රක්ෂණ ප්රතිලාභය ලබාදෙනවා….
දැනට විශ්රාම ගෙන ඇති ලක්ෂ 6ක් පමණ වන සියලුම විශ්රාමික රජයේ සේවකයන් සඳහා අග්රහාර රක්ෂණ ප්රතිලාභ ලබා දීමට කැබිනට් මණ්ඩලය තීරණය කර ඇතැයි ශ්රී ලංකා පොදුජන පෙරමුණේ නායක, අග්රාමාත්ය මහින්ද රාජපක්ෂ මහතා පවසයි.
අග්රාමාත්යවරයා මේ බව සඳහන් කර සිටියේ අද (2020.07.25) පස්වරුවේ බණ්ඩාරවෙල නගර ශාලාවේ පැවති හමුවේදීය.
අග්රහාර රක්ෂණය මෙපමණ කාලයක් ලබාදුන්නේ 2016 ජනවාරි පළවෙනිදාට පසුව විශ්රාම ගිය රාජ්ය සේවකයන්ට, එනම් විශ්රාමිකයින්ගෙන් 10%කට පමණක් බව පෙන්වා දුන් අග්රාමාත්යවරයා වැඩිදුරටත් සඳහන් කර සිටියේ 2016 ජනවාරි පළමු වෙනිදාට පෙර විශ්රාම ලැබූ රජයේ සේවකයින් සියලු දෙනාටත් අග්රහාර රක්ෂණය ලබාදිය යුතු බව තමන් කැබිනට් මණ්ඩලයට දැනුම් දුන් බවයි.
රජයේ සේවකයින් සහ විශ්රාමිකයින් සඳහා රජයේ රෝහල්වල විශේෂ වාට්ටු ඇති කිරීමටද කැබිනට් මණ්ඩලයේ අනුමැතිය හිමි වූ බව අග්රාමාත්යවරයා මෙහිදී ප්රකාශ කළේය.
එමෙන්ම විශ්රාම වැටුප් ලබාදීමේදි පවතින විෂමතා හඳුනාගෙන ඒ සඳහා විධිමත් වැඩපිළිවෙළක් හඳුන්වා දීමට කටයුතු කරන බවද අග්රාමාත්යවරයා අවධාරණය කළේය.
බණ්ඩාරවෙල නගර සංවර්ධනය සඳහා කෝටි පනහක මුදලක් මේ වන විට වෙන් කර ඇති බවත්, එම නගර සංවර්ධනය හරහා බණ්ඩාරවෙල දුෂ්කරතාවලින් තොර නව නගරයක් බවට පත් lrk බවත්, අග්රාමාත්යවරයා මෙම හමුවේදි පැවසුවේය.
බණ්ඩාරවෙල එළවළු නිෂ්පාදනය සඳහා ගොවීන්ට ශ්රී ලංකා පොදුජන පෙරමුණු ආණ්ඩුවක් යටතේ සාධාරණ මිලක් ලබාදීමට කටයුතු කරන බවද අග්රාමාත්යවරයා වැඩිදුරටත් ප්රකාශ කළේය.
මෙම හමුව සඳහා හිටපු කතානායක වී.ජ.මූ.ලොකුබණ්ඩාර, ශ්රී ලංකා පොදුජන පෙරමුණෙන් මෙවර මහා මැතිවරණය සඳහා බදුල්ල දිස්ත්රික්කයෙන් තරඟවදින අපේක්ෂකයින් වන හිටපු අමාත්ය නිමල් සිරිපාල ද සිල්වා, හිටපු පාර්ලිමේන්තු මන්ත්රී තේනුක විදානගමගේ, සුදර්ශන දෙනිපිටිය, උදිත් ලොකුබණ්ඩාර, ඕෂධී හේවාමද්දුම ඇතුළු පිරිසක් සහභාගී වූහ.
