ගම්වදින හිවලුන් හේතුවෙන් භීතියට පත්ව සිටින මිල්ලනිය මුවපට්ටිය ගම්මානයේ ජනතාව ගැන පසුගියදා “අද දෙරණ“ හෙළිදරව් කළේය.
එම හෙළිදරව්වෙන් පසු එම ගම්මානයේ ආරක්ෂාව සඳහා වනජීවි දෙපාර්තමේන්තුව විශේෂ වැඩපිළිවෙළක් මේ වන විට ක්‍රියාත්මක කර තිබේ.
හිවලුන් රංචු පිටින් කඩාවැදී නිවෙස්වල ඇති කරන සතුන් සහ මාර්ගයේ ගමන් ගන්නා මිනිසුන්ව සපා කෑම පිළිබඳ සිද්ධීන් වාර්තා වූ අතර හිවලුන් ගේ සපාකෑම නිසා මෑතකදී මරණ දෙකක් ද එම ගම්මානයෙන් වාර්තා වුණි.
භීතියට පත්ව සිටින කළුතර මුවපට්ටිය ගම්මානය පිළිබඳව “අද දෙරණ“ ඉකුත් සඳුදා අනාවරණ කළේ වනජීවී ඇමතිගේ අවධානයට ඊට යොමුකරමිනි.
හිවලුන් සපාකෑම නිසා ජලභීතිකා රෝගය වැළඳී තිබූ මී ගවයකුද අද මිය ගිය බව අප වාර්තාකරු පැවසීය.
අද දෙරණ මේ පිළිබඳ කළ අනාවරණයේ ප්‍රතිඵලයක් ලෙස කළුතර දිස්ත්‍රික් ලේකම්වරයාගේ ප්‍රධානත්වයෙන් මිල්ලනිය ප්‍රාදේශීය ලේකම් කාර්යාලයේ ඊයේ පස්වරුවේ විශේෂ සාකච්ඡාවක් පැවැත්වුණි.
ගමට කඩා වදින හිවලුන් පිළිබඳ වනජීවි බලධාරීන්ට ක්ෂණිකව දැනුම්දීමට ගම්වාසීන් සඳහා 1992 විශේෂ දුරකථන අංකය හඳුන්වාදීමට එහිදී පියවර ගැනුණි.
එසේම රාත්‍රී කාලයේ ගමන් බිමන් යාමෙන් වළකින ලෙසද ගම්වාසීන්ගෙන් ඉල්ලීමක් කෙරිණි.
