ශ්‍රී ලාංකිකයින් 300කට වැඩි පිරිසක් රැගෙන එයි
කොවිඩ් නයින්ටීන් වෛරස ව්‍යාප්තිය හේතුවෙන් විදෙස් රටවල් අතරමංව සිටි තවත් ශ්‍රී ලාංකිකයින් 300 කට වැඩි පිරිසක් දිවයිනට පැමිණ ඇත.
ඔවුන් අද (15) අළුයම ඩුබායි, කටාර්, මුම්බායි හා ලෙබනන් සිට දිවයිනට පැමිණ ඇති බව “අද දෙරණ” ගුවන් තොටුපොළ වාර්තාකරු සඳහන් කළේය.
ඒ අනුව, අද උදෑසන 07.30 ට පමණ ලෙබනන් බේරූට් හි සිට යූ.එල්. 1506 දරන විශේෂ ගුවන් යානයෙන් ශ්‍රී ලාංකිකයින් 245 දෙනෙකු දිවයිනට පැමිණ තිබේ.
මීට අමතරව, අබුඩාබි, දෝහා කටාර් හි සිට ශ්‍රී ලාංකිකයින් 51 දෙනෙකු කටාර් සහ ඉටිහාඩ් ගුවන් සේවයට අයත් ගුවන් යානා මගින් දිවයිනට පැමිණ ඇති බව සදහන් වේ.
ශ්‍රී ලංකන් ගුවන් සේවයේ යූ.එල්. 1042 දරන ගුවන් යානයෙන් ශ්‍රීලාංකිකයින් 13 දෙනෙකු අද අළුයම මුම්බායි හි සිට දිවයිනට පැමිණ ඇත.
මෙලෙස දිවයිනට පැමිණි සියලු ශ්‍රී ලාංකිකයින් පී.සී. ආර් පරීක්ෂණ සඳහා යොමු කර ඇති අතර අනතුරුව ඔවුන් නිරෝධායන මධ්‍යස්ථාන වෙත යොමු කර ඇති බව වාර්තා වේ.
මේ අතර, යුද හමුදාව මගින් ක්‍රියාත්මක වන නිරෝධායන මධ්‍යස්ථාන තුළ නිරෝධායන කටයුතු අවසන් කළ පුද්ගලයින් 160 දෙනෙකු සිය නිවෙස් වෙත පිටත්ව ගොස් තිබේ.
ඒ අනුව, මේ වන විට නිරෝධායනය අවසන් කළ සමස්ත පුද්ගලයින් සංඛ්‍යාව 30,274 ක් බව කොවිඩ් නයින්ටීන් පැතිරීම වැළැක්වීමේ ජාතික ක්‍රියාන්විත මධ්‍යස්ථානය සඳහන් කළේය.
කෙසේවෙතත් තවත් පුද්ගලයින් 4689 දෙනෙකු නිරෝධායන මධ්‍යස්ථාන 41 ක් තුළ නිරෝධායනය වෙමින් සිටින බව ද එම මධ්‍යස්ථානය සඳහන් කළේය.
