සජිත්ගේ ජනහමුවට ගල් ගැසූ දෙදෙනෙක් අත්අඩංගුවට
විපක්ෂ නායක සජිත් ප්‍රේමදාස මහතා සහභාගී වූ රත්මලානේ පැවති ජනහමුවකට ගල් මුල් ප්‍රහාරයක් එල්ල කිරීම සම්බන්ධයෙන් සැකකරුවන් දෙදෙනෙක් අත්අඩංගුවට ගෙන තිබේ.
ඊයේ (29) විපක්ෂනායකවරයා ජනහමුව අමතමින් සිටින අවස්ථාවේදී වේදිකාව දෙසට එලෙස ප්‍රහාරය එල්ල වී තිබුණි.
පොලීසිය පැවසුවේ එම පුද්ගලයින් දෙදෙනා බීමත්ව සිට ඇති බවය.
ඊයේ (29) රාත්‍රී 9.45ට පමණ ගල්කිස්ස බංගලාව පාරේ නිවාස සංකීර්ණයක එම ජනහමුව පවත්වා තිබේ.
එහිදී කිසියම් පිරිසක් හෝ කිහිප දෙනෙක් විසින් එම ස්ථානයට ගල් ප්‍රහාර කිහිපයක් එල්ල කර තිබුණි.
එම ගල් ප්‍රහාරවලින් කිසිවෙකුටත් තුවාල සිදුව නොමැති අතර, සිද්ධිය සම්බන්ධයෙන් ගල්කිස්ස පොලීසිය විමර්ශන ඇරඹීය.
ඒ අනුව ගල් ප්‍රහාරය එල්ල කළ බවට සැක කෙරෙන පුද්ගලයෙක් අද (30) අලුයම අත්අඩංගුවට ගෙන ඇත්තේ ගල්කිස්ස රෂ්ටම්වත්ත ප්‍රදේශයේ දීය.
මෙම සිද්ධිය සම්බන්ධයෙන් තවත් සැකකරුවෙක් අද උදෑසන ගල්කිස්ස පොලීසියට භාර වීමෙන් පසු අත්අඩංගුවට ගෙන ඇත.
අත්ඩංගුවට ගෙන ඇත්තේ වයස අවුරුදු 21ක් 40ක් වු එම ප්‍රදේශයේ පදිංචිකරුවන්ය.
සැකකරුවන් අද දින ගල්කිස්ස මහෙස්ත්‍රාත් අධිකරණයට ඉදිරිපත් කිරීමට නියමිතය.
