සුනාමි ඛේදවාචකය සිදුවී අදට (26) වසර 17ක් සපිරෙයි.
සුනාමි රළ පහරට හසුව පැරෑලිය ප්‍රදේශයේදී අනතුරට පත්වූ අංක 50 දුම්රියේ එන්ජිම අදත් වෙනදා මෙන්ම කොළඹින් පෙරවරු 6.50ට පිටත්වී තිබුණි.
එය ගාල්ල පැරෑලිය ප්‍රදේශයේදී අනතුරට පත්වූ ස්ථානයේදී නවත්වනු ලැබීය.
ඒ, මෙම ඛේදවාචකයෙන් රළ අතර සැඟවුණු ආදරණීයයන් සිහිපත් කිරීමටය.
සුනාමි ඛේදවාචකය ඇතිවූ දිනයේ දුම්රිය ධාවනය කරවීමට නියමිතව සිටි රියදුරු කැලුම් ගාල්ලගේ මහතා සිය මතකය අවදි කරමින් සඳහන් කළේ,
“මීට අවුරුදු 18 පෙර මේ අංක 50 දුම්රියට යොදවලා හිටපු රියදුරා මමයි. නමුත් එදා මගේ අම්මාගේ අසනීප තත්ත්වය නිසා මට හදිසියේ නිවාඩු ගන්න සිදුවුණා. එවිට පොරොත්තු සේවයේ සිටි රියදුරු මහත්මයෙක් වන ජානක ප්‍රනාන්දු මහතාට සිදුවුණා මේ දුම්රියේ වැඩකරන්න. එදා තමයි මේ අවාසනාවන්නත සිද්ධියෙන් ඔහු මියගියේ. බොහෝ පිරිස කිව්වා අම්මා නිසා මාව බේරුනා කියලා.”
2004 වසරේ දෙසැම්බර් මස 26 වනදා ඉන්දුනීසියාවේ සුමාත්‍රා දූපත ආසන්න මුහුදු පතුලේ ඇතිවූ රිච්ටර් පරිමාණයේ ඒකක 9ක් තරම් ප්‍රබල වූ භූ කම්පනයේ අවසන් ප්‍රතිඵලය වූයේ රටවල් රැසක ජීවිත ලක්ෂ ගණනක් බිලිගත් සුනාමි ව්‍යසනයයි.
උදෑසන 6.58 ට පමණ සුමත්‍රා දූපත ආසන්නයේ හටගත් සුනාමි රළ අතරින් ප්‍රබලතම උදම් රළ පහර ඉන් පැය දෙකකට පමණ පසු ශ්‍රී ලංකාවට ළඟා වුයේ පැයට කිලෝමීටර් 800 ක තරම් වේගයකිනි.
ඒ උදෑසන 9.26ට පමණය.
චණ්ඩ රළ පහර මිනිත්තු කිහිපයක් තුළ මෙරට ජීවිත 35,000කට අධික සංඛ්‍යාවක් බිලිගනිමින් රුපියල් කෝටි ගණනක දේපළ විනාශ කළේය.
ඒ අනුව මෙම ඛේදවාචකයට ගොදුරු වූ ආදරණීයන් සිහිකරමින් අද පෙරවරු 09.25 සිට පෙරවරු 09.27 දක්වා විනාඩි 02ක කාලයක් නිශ්ශබ්දතාව සුරැකීම දිවයින පුරා සිදුවිය.
