හිටපු අග්‍රාමාත්‍ය රනිල් වික්‍රමසිංහ, මංගල සමරවීර,අනුර කුමාර දිසානායක, එම්.ඒ.සුමන්තිරන් යන මහත්වරුන් ඇතුළු දේශපාලනඥයින් පිරිසක් අද (19) දේශපාලන පළිගැනීම් පිළිබඳ සෙවීමේ ජනාධිපති පරීක්ෂණ කොමිෂන් සභාව වෙත පැමිණ තිබේ.
ඒ අද පෙරවරු 10 ට කොමිසම හමුවේ පෙනී සිටින ලෙස ඔවුන්ට කළ දැනුම්දීමකට අනුවය.
හිටපු අග්‍රාමාත්‍ය රනිල් වික්‍රමසිංහ මහතා අද පෙරවරු 10 ට පමණ දේශපාලන පළිගැනීම් පිළිබඳ සෙවීමේ ජනාධිපති පරීක්ෂණ කොමිෂන් සභාව වෙත පැමිණියේය.
එමෙන්ම යහපාලන රජයේ පැවති දූෂණ විරෝධී කමිටුවේ සාමාජිකයින් වන මංගල සමරවීර, පාඨලී චම්පික රණවක, මලික් සමරවික්‍රම, අනුර කුමාර දිසානායක සහ එම්.ඒ. සුමන්තිරන් යන මහත්වරුන් ද අද පෙරවරුවේ ජනපති කොමිසම හමුවේ පෙනී සිටි බව අප වාර්තාකරු පැවසීය.
රාවුෆ් හකීම්, ආර්. සම්බන්ධන් සහ සරත් ෆොන්සේකා, යන මහත්වරුන් අද දිනයේ ජනපති කොමිසම හමුවේ පෙනී සිටිමට නියමිතය.
දිවි නැගුම හිටපු අධ්‍යක්ෂ ජනරාල් කිත්සිරි රණවක මහතා විසින් ඉදිරිපත් කළ පැමිණිල්ලකට අදාළ ව වගඋත්තරකරුවන් ලෙස නම්කළ ඔවුන්ට එසේ කොමිසම හමුවේ පෙනී සිටින ලෙස දන්වා තිබුණි.
ප්‍රකාශ ලබාදීමෙන් අනතුරුව උදෑසන 11.30ට පමණ හිටපු අග්‍රාමාත්‍ය රනිල් වික්‍රමසිංහ මහතා, එම්.ඒ. සුමන්තිරන් මහතා හා අනුර කුමාර දිසානායක මහතා කොමිසමෙන් පිටව ගොස් ඇත.
මේ අතර රුසියාවේ හිටපු ශ්‍රී ලංකා තානාපති උදයංග වීරතුංග මහතා ද දේශපාලන පලිගැනීම් පිළිබඳ සෙවීමේ ජනාධිපති කොමිසම හමුවේ පෙනී සිටීමට අද පෙරවරුවේ එහි පැමිණියේය.
නීත්‍යානුකූල ආකාරයෙන් ගෙන්වන ලද කන්ටේනර් රථයක් නීතිවිරෝධීව රේගුව තුළ රඳවා ගනිමින් නඩු පැවරීමෙන් තමන් දේශපාලන පලිගැනීමට ලක්වූ බව පවසා සිදුකළ පැමිණිල්ලකට අදාළව ප්‍රකාශයක් ලබාදීම සඳහා ඔහු කොමිසම හමුවේ පෙනී සිටින බව සඳහන් වේ.
