අමාත්ය විජිත හේරත් මහතා බෙලරුස් ජනාධිපති ඇලෙක්සැන්ඩර් ලූකෂෙන්කෝ හමුවීමෙන් පසු මෙම සංචාරය ශ්රී ලංකා-බෙලරුස් සබඳතාවල “නව පරිච්ඡේදයක” ආරම්භය බව ප්රකාශ කරයි
විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා බෙලරුස් රාජ්යයේ සිදු කළ නිල සංචාරය අතරතුර එරට ජනාධිපති ඇලෙක්සැන්ඩර් ලූකෂෙන්කෝ මහතා හමුවිය. ශ්රී ලංකාව සහ බෙලරුස් රාජ්යය අතර රාජ්යතාන්ත්රික සබඳතාවලට වසර 25ක් සපිරෙන මෙම අවස්ථාවේදී, දෙරට අතර පවතින දීර්ඝකාලීන මිත්රත්වය සහ සහයෝගීතාව තවදුරටත් ශක්තිමත් කිරීමට දෙපාර්ශවයම මෙහිදී සිය කැපවීම යළි තහවුරු කළහ.
මෙම සාකච්ඡාවල දී ප්රධාන අවධානය යොමු වූයේ වෙළඳාම, කර්මාන්ත, කෘෂිකර්මාන්තය, සංචාරක ව්යාපාරය, අධ්යාපනය සහ දෙරටේ ජනතාව අතර සබඳතා ඇතුළු අන්යෝන්ය වශයෙන් වාසිදායක ක්ෂේත්ර කිහිපයක සහයෝගීතාව ඉහළ නැංවීම සඳහා පැහැදිලි මාර්ග සිතියමක් සකස් කිරීම කෙරෙහි ය. බෙලරුස් නායකයින්, ජ්යෙෂ්ඨ නිලධාරීන්, ව්යාපාරික නියෝජිතයින් සහ සංචාරක ක්ෂේත්රයේ පාර්ශවකරුවන් සමඟ පැවැත්වූ ඵලදායී සාකච්ඡා මාලාවකින් අනතුරුව, මෙම සංචාරය ද්විපාර්ශ්වික සබඳතා ඉදිරියට ගෙන යාමේ වැදගත් පියවරක් ලෙස අමාත්ය හේරත් මහතා විස්තර කළේය.
වෙළඳ හා ආර්ථික සහයෝගීතාව ඉහළ නැංවීම ඉලක්ක කරගත් ගිවිසුම් කිහිපයකට මෙම සංචාරයේදී එළඹුණු අතර, ඒ යටතේ මෙම වසර අවසානය වන විට ශ්රී ලංකාව සහ බෙලරුස් අතර සෘජු ගුවන් සේවා ආරම්භ කිරීමට ද සැලසුම් කර ඇත. මීට අමතරව සංචාරක ව්යාපාරය, අධ්යාපනය, මැණික්, කෘෂිකාර්මික යන්ත්රෝපකරණ, පොහොර සහ අනෙකුත් ප්රධාන ක්ෂේත්රයන්හි සහයෝගීතාව සඳහා ඇති අවස්ථා පිළිබඳව ද මෙහිදී දීර්ඝ ලෙස සාකච්ඡා කෙරිණි.
මෙම හමුවෙන් අනතුරුව මාධ්ය වෙත අදහස් දැක්වූ අමාත්ය විජිත හේරත් මහතා, මෙම සංචාරය ශ්රී ලංකා-බෙලරුස් සබඳතාවල “නව පරිච්ඡේදයක” ආරම්භය බව ප්රකාශ කළේය. සැලසුම් කර ඇති සෘජු ගුවන් සම්බන්ධතාවය හරහා සංචාරක ව්යාපාරය ප්රවර්ධනය වන අතරම, බෙලරුස් හි අධ්යාපනය ලබන ශ්රී ලාංකික සිසුන්ට ද එය විශාල පහසුවක් වනු ඇති බව ඔහු සඳහන් කළේය. මැණික්, කෘෂිකාර්මික යන්ත්රෝපකරණ, යාන්ත්රික ඉංජිනේරු ශිල්පය සහ පොහොර වැනි අංශවල සහයෝගීතාවයේ වැදගත්කම ද අමාත්යවරයා මෙහිදී අවධාරණය කළ අතර, මෙම ගිවිසුම් හරහා දෙරට අතර වෙළඳ, සංචාරක සහ අධ්යාපනික සබඳතා තවදුරටත් ශක්තිමත් වන බව ද පැවසීය.
