ශ්රී ලංකා පොදුජන පෙරමුණේ නවක මන්ත්රීවරුන්ට නායකත්වය ලබාදීමට පාර්ලිමේන්තුවට පැමිණෙන්නැයි බැසිල් රාජපක්ෂ මහතාට අද (28) එම පක්ෂයේ නවක මන්ත්රීවරුන් විසින් ආරාධනාවක් කර තිබේ.
ඒ, බත්තරමුල්ල නෙළුම් මාවතේ පිහිටි පක්ෂ කාර්යාලයේ අද (28) පැවැති මාධ්ය හමුවේදීය.
මාධ්ය හමුවේදී අදහස් දැක්වු බදුල්ල දිස්ත්රික් පාර්ලිමේන්තු මන්ත්රී ඩිලාන් පෙරේරා මහතා මෙසේ සිය අදහස් දැක්වීය.
“ද්විත්ව පුරවැසිභාවය තියෙන බැසිල් මහත්තයාව මහේන්ද්රන්ට සමාන කරන්න එපා..බැසිල් රාජපක්ෂ මේ රටේ පුරවැසියෙක්..රාජපක්ෂ භීතිකාව ඔලුවෙන් අයින් කරගන්න..එතකොට මීට වඩා සාධනීයව මේ කරුණු කාරණා දිහා බලන්න පුළුවන්..”
එහිදී අදහස් දක්වමින් ශ්රී ලංකා පොදුජන පෙරමුණේ ගම්පහ දිස්ත්රික් පාර්ලිමේන්තු මන්ත්රී සහන් ප්රදීප් මහතා ප්රකාශ කර සිටියේ රට ගොඩනැගීම සඳහා නායකත්වය ලබාදීමට පාර්ලිමේන්තුවට පැමිණෙන්නැයි තමා නවක මන්ත්රීවරයෙකු ලෙස, බැසිල් රාජපක්ෂ මහතාට ආරාධනා කරන බවය.
ශ්රී ලංකා පොදුජන පෙරමුණේ මාතලේ දිස්ත්රික් පාර්ලිමේන්තු මන්ත්රී රෝහණ දිසානායක මහතා කියා සිටියේ බැසිල් රාජපක්ෂ මහතා විශාල දැනුමක් සහිත නායකයෙකු බවය.
මෙම ආරාධනාව සම්බන්ධව අද කොළඹ පැවති උත්සවයකින් අනතුරුව මාධ්ය වෙත අදහස් දක්වමින් බැසිල් රාජපක්ෂ මහතා කියා සිටියේ රටේ ජනතාව තමන්ට ආරාධනා කර සිටියොත් ඒ පිළිබඳ සිතා බලන නමුත් දැනට සිටින අයුරින්ම සිටීමට තමන් කැමති බවය.
ව්යවස්ථා සංශෝධනය පිළිබඳව එහිදී මාධ්යවේදීන් විමසු ප්රශ්නයකට පිළිතුරු දෙමින් ඒ මහතා මෙසේ පැවසීය.
“අපිට 113ක් තිබුණානම් හොඳටම ඇති. ජනතාව 150ක්ම දුන්නේ ව්යවස්ථා වෙනසකට. ඒ සඳහා ක්රියා කරනවා ඉක්මනින්ම..”
