බුලත්කොහුපිටිය සෞඛ්‍ය වෛද්‍ය නිලධාරී කොට්ඨාසය තුළ කොවිඩ් නයින්ටීන් ආසාදිතයින් 11 දෙනෙකු හඳුනාගෙන තිබේ.
මේ හේතුවෙන් බුලත්කොහුපිටිය සහ ලැවල ග්‍රාම නිලධාරී වසම් හි සංචරණ සීමා පැනවීමට පියවර ගත් බව බුලත්කොහුපිටිය සෞඛ්‍ය වෛද්‍ය නිලධාරී වෛද්‍ය අමිල ගුණසේකර මහතා පැවසුවේය.
වැඩිදුරටත් අදහස් දැක්වු ඒ මහතා,
“මේ වන විට පීසීආර් පරීක්ෂණ 30ක් කරපු එකෙන් 11ක් බුලත්කොහුපිටිය කොට්ඨාසයට අදාළව පොසිටිව් වෙලා තියෙනවා. ඒ අයගෙන් වැඩි ප්‍රමාණයක් ඉන්නේ මාළු වෙළෙඳාමේ නිරත වුණ අය සහ ඔවුන්ගේ ආශ්‍රිතයින්. ඒ කට්ටිය සහ ඒ අයගේ පළමු සම්බන්ධ වුණ අය හොයන්න මේ වෙලාවේ සැළසුම් කරලා තියෙන්නේ. ඉතින් ඒ ගොල්ලෝ හොයා ගෙන ඒ අයව ස්වං නිරෝධායනයට යොමු කරන එක තමයි අපේ බලාපොරොත්තුව. ඒ අනුව බුලත්කොහුපිටිය හා ලැවල කොට්ඨාසවල පැය 24ක කාලයකට කට්ටිය හොයා ගන්නකල් සංචරණය සීමා කරලා කටයුතු කරන්න කියලා. එතකොට අපිට පුළුවන් වෙනවා මේ අයව හොයා ගෙන ඉදිරියේ දී ස්වයං නිරෝධායනයට යොමු කරන්න සහ ඉදිරි කටයුතු කරන්න. පීසීආර් පොසිටිව් වුණ අය ඉක්මනින්ම රෝහල් වෙත යොමු කරන්නත් පුළුවන් වෙනවා.“
